რაიან გიგზმა თავის ყოველკვირეულ გრაფაში დაწერა, რომ გასულ სეზონში, როცა "მანჩესტერ იუნაიტედის" მთავარი მწვრთნელის ასისტენტის პოსტი ეკავა, "ლესტერიდან ნ'გოლო კანტეს შეძენის იმედი ჰქონდა.
ფრანგი ნახევარმცველი ერთ-ერთი მთავარი შემოქმედი იყო "მელიების" მიერ გასულ სეზონში მოპოვებული ჩემპიონობისა. ზაფხულში კი მან "ქინგ პაუერს სტედიუმი" დატოვა და "ჩელსიში" გადავიდა, სადაც კვლავ დამაჯერებლად და წარმატებით ასპარეზობს და ზედიზედ მეორედ გაჩემპიონების შანსი აქვს.
"იუნაიტედის" ლეგენდარულ ფეხბურთელს სურდა, რომ "ლესტერის" ყოფილი მოთამაშე "ოლდ ტრაფორდზე" ეხილა, სადაც თავად ლუი ვან გაალს უწევდა ასისტენტობას.
"მხოლოდ იმის თქმა შემიძლია, რომ გასულ სეზონში "იუნაიტედში" კანტეს შეძენის იმედი მქონდა. მის კონტრაქტში გამოსასყიდ თანხად შეტანილი 29 მილიონი ფუნტი ძალიან კარგი ფასი იყო.
კანტე ბურთზე ნადირობს. მანძილს ძალიან სწრაფად ფარავს, ბურთამდე მიდის და მეტოქეს ართმევს. ასეთი ტიპის ფეხბურთელების წინააღმდეგ მრავალი წელი მითამაშია. ეს კოშმარია - მათ თავს ვერ დააღწევ", - დაწერა გიგზმა თავის გრაფაში.