"მანჩესტერ იუნაიტედმა" მადრიდის "ატლეტიკოს" თავდამსხმელთან, ანტუან გრიზმანთან სიტყვიერ შეთანხმებას მიაღწია და ფრანგს ზაფხულში შეიძენს - იტყობინება ფრანგული მედია.

მიუხედავად იმისა, რომ "იუნაიტედს" ჯერ მადრიდულ კლუბთან შეთანხმებისთვის არ მიუღწევია, გრიზმანს "ოლდ ტრაფორდზე" გადასვლა ნამდვილად სურს და ამის სანაცვლოდ წელიწადში 15 მლნ. ფუნტს მიიღებს.

ენრიკე სერესომ, "ატლეტიკოს" პრეზიდენტმა მზადყოფნა გამოხატა გრიზმანის შესანარჩუნებლად ბრძოლისათვის და მანვე დაადასტურა, რომ "იუნაიტედი" ერთ-ერთი კლუბია მრავალთა შორის, რომელთაც ფრანგის შეძენა სურთ.

თუმცა, "ატლეტიკო" სრულიად უძლური იქნება, თუკი გამოჩნდება გუნდი, რომელიც გრიზმანის გამოსასყიდ თანხას, 100 მილიონ ევროს, ანუ 85 მლნ. ფუნტს გადაიხდის. თავდამსხმელს, რომელსაც "ოლდ ტრაფორდზე" 7-ნომრიან მაისურს მისცემენ, ახლო ურთიერთობა აქვს "იუნაიტედის" ნახევარმცველ პოლ პოგბასთან და ეს ერთ-ერთი მთავარი ფაქტორი იქნება 25 წლის ფეხბურთელის გადაბირებისა, იტყობინება ფრანგული Yahoo Sport-ი.

პრეზიდენტისგან განსხვავებული დამოკიდებულება აქვს "ატლეტიკოს" მთავარ მწვრთნელს, რომელმაც განაცხადა, რომ კოპა დელ რეის ნახევარფინალში "ბარსელონასთან" მისი გუნდის ერთადერთი გოლის ავტორს გუნდში იძულებით არ გააჩერებს.

თავის მხრივ კლუბის დატოვებას აპირებს დიეგო სიმეონეც, რომელმაც გასულ სექტემბერს უცნაური გადაწყვეტილება მიიღო და "ატლეტიკოსთან" კონტრაქტის ვადა 2 წლით შეამცირა. ეს ფაქტი კი კიდევ ერთი მიზეზი იქნება იმისა, რომ გრიზმანი კლუბს შეიცვლის.

წყარო: telegraph