აქსელ ტუანზებე "მანჩესტერ იუნაიტედში" თავის დებიუტს ოცნების ახდენას უწოდებს და ცენტრალურ მცველს იმედი აქვს, რომ პირველ გუნდში ადგილს დაიმკვიდრებს.

ახალგაზრდა მცველმა - რომელიც ჟოზე მოურინიომ ახლახანს გამოიძახა რეზერვების რიგებში წარმატებული ასპარეზობის გამო - "უიგანთან" ინგლისის თასის მატჩში მოახერხა პირველ გუნდში თავისი პირველი მატჩის ჩატარება, როცა მატჩის დასრულებამდე 23 წუთით ადრე ტიმოთი ფოსუ-მენსა შეცვალა.

კლუბის ოფიციალურ ტელევიზიასთან საუბრისას ტუანზებემ აღნიშნა, რომ თამაშში ჩართვა დაუვიწყარი გამოცდილებაა და თავის შესაძლებლობას მჭიდროდ ჩაეჭიდება.

"სიგიჟე იყო. პატარაობიდანვე ამაზე ვფიქრობ და ახლა ამიხდა, არ მჯერა, რომ ეს მოხდა. მე და ჩემი ოჯახი ძალიან ვამაყობთ, მაგრამ ახლა სავარჯიშო მოედანს უნდა დავუბრუნდე და ყველაფერი თავიდან დავიწყო. 23-წლამდელთა გუნდთან ერთად თუ მომიწევს თამაში, დაე, მომიწიოს, მაგრამ თავმდაბლობას არ დავკარგავ და თამაშის მორიგ შესაძლებლობას დაველოდები.

უკან არ უნდა იხედებოდე. ჩვენი მწვრთნელი გვეუბნებოდა, რომ ყველაზე რთული ნაწილი გუნდში ადგილის შენარჩუნებაა, სავარჯიშო მოედანს უნდა დავუბრუნდე და ყოველდღე ვიშრომო", - განაცხადა აქსელმა.

მოედნის კიდეზე გულისამაჩუყებელი მომენტი იყო, როცა მოედანზე გასვლამდე ტუანზებე მოურინიოს გადაეხვია და ხელი ჩამოართვა უორენ ჯოისს, ადამიანს, რომელმაც მის წარმატებაში დიდი როლი ითამაშა.

"კიდეზე ვიყავი და მესმოდა, რომ ზლატანი მეუბნებოდა "მარტივად მიუდექი, მარტივად მიუდექი", მე კი მის რჩევას მივყევი. ჩემს მომენტს ველოდი და ის დადგა. კარგი იყო, რომ უორენიც იქვე იდგა. მე მის ხელში გავიზარდე და მისთვისაც საამაყოა ჩემი თამაშის ხილვა.

როგორც კი თამაშს იწყებ, მხოლოდ შენს პირად თამაშზე ხარ კონცენტრირებული. მატჩს შეიგრძნობ, ბურთს რამდენიმეჯერ ეხები. უფროსი ბიჭები მხარში მედგნენ, ანდერი ჩემთან მოვიდა და რჩევებს მაძლევდა. კარგია, რომ პირველი გუნდის გამოცდილი ფეხბურთელებისგან ასეთ მხარდაჭერას გრძნობ, როგორც ახალგაზრდას, მუხტი გეძლევა და ამაზე უკეთესი შეგრძნება არ არსებობს", - დაასრულა ახალგაზდა მცველმა.



წყარო: manutd.com