"მანჩესტერ იუნაიტედის" მთავარი მწვრთნელი ჟოზე მოურინიო თვლის, რომ მის გუნდს ჩემპიონობისთვის ბრძოლაში ფრეების თამაში უშლის ხელს.
"სტოკ სიტისთან" გუშინდელ მატჩში ნაჩვენები შედეგი "იუნაიტედისთვის" მერვე ფრე გამოდგა მიმდინარე სეზონის პრემიერ ლიგაში.
ზაფხულში "წითლების" მთავარი მწვრთნელის პოსტზე დანიშვნის შემდეგ მოურინიომ განაცხადა, რომ მისი მთავარი მიზანი ჩემპიონობისთვის ბრძოლა იქნებოდა. თუმცა პორტუგალიელი აცნობიერებს, რომ ამის მიღწევა ძალიან რთული იქნება, რასაც პრემიერ ლიგაში დაკარგული ქულების რაოდენობა ადასტურებს.
"ჩემს პირველ, მეორე, მესამე, მეოთხე ან მეხუთე პრესკოფერენციას მოუსმინეთ. ასეთი მიზნების შესახებ იმიტომ ვლაპარაკობდი, რომ "მანჩესტერ იუნაიტედში" სხვაგვარად ვერც იტყვი. ვფიქრობ, რომ არ არსებობს განვითარების უკეთესი ვარიანტი, ვიდრე უმაღლესი მიზნების დასახვა.
მაგრამ გარკვეული მიზეზების გამო "მანჩესტერ იუნაიტედი" ბოლო სამი წელი ჩემპიონი ვერ ხდებოდა. ფეხბურთში ძალიან რთულია ყველა ასპექტში სრულყოფილების მიღწევა და ჩემთვის მთავარი გაუმჯობესება ის არის, რომ ყოველი მომდევნო მატჩის მოგება გვსურს, დამოუკიდებლად მეტოქისა და ტურნირისა. ყოველ მატჩში გამარჯვებისკენ ვისწრაფვით - ასეთი მენტალიტეტი გვაქვს.
ცხადია, ყველა შეხვედრას ვერ ვიგებთ, მაგალითად, პრემიერ ლიგაში ხშირად ვთამაშობთ ფრეს და დღესაც გამოჩნდა, რომ ასე მოხდა. იმიტომ, რომ მეტოქე მომენტის შეუქმნელადაც კი იტანს გოლს, ჩვენ კი ერთი გოლის გასატანად 6-7 მომენტის შექმნა გვჭირდება. რთულია", - განაცხადა "იუნაიტედის" მწვრთნელმა.