ჟოზე მოურინიო "სტოკ სიტისთან" რთულ დაპირისპირებას ელის, როცა "მანჩესტერ იუნაიტედი" "მეთუნუქეებს" ეწვევა.

"წითლებს" ყველა ტურნირზე 16-მატჩიანი წაუგებელი სერია აქვთ, "სტოკმა" კი პრემიერ ლიგაში "იუნაიტედზე" ორივე გამარჯვება ბოლო სამ წელში მოიპოვა.

კლუბის ოფიციალურ ტელევიზიასთან საუბრისას მოურინიომ აღნიშნა, რომ მისი გუნდი მარკ ჰიუზთან მორიგ რთულ დაპირისპირებას უნდა ელოდეს, მაგრამ სახლში სამი ქულით დაბრუნებას აპირებს.

"სტოკმა" საკუთარ თამაშში რამდენიმე ცვლილება შეიტანა. მათი თამაშის ხარისხზე ახლა უფრო მეტს ფიქრობენ. მაგრამ რაღაცები მათ დნმ-ს მაინც ეკუთვნის. ფიზიკური ფეხბურთელები, მაღალი თავდამსხმელები, გრძელი გადაცემები, სახიფათო სტანდარტულები, ტრიბუნებიდან წამოსული მოტივაცია, ქარიანი სტადიონი, სადაც გაცილებით მეტად არიან შეგუებულნი ქარის მიმართულების საწინააღმდეგოდ თუ შესაბამისად თამაშს - ამას ადვილად ეგუებიან. მაგრამ, ვნახოთ.

სიცივეა, მაგრამ ჩემთვის ერთ-ერთ დრამატულ ზამთრის დღეს არ ჰგავს. როგორც ჩანს, წვიმა არ იქნება, ასე რომ, ვგონებ, კარგი პირობები გვექნება. მატჩი სამ საათზე შედგება (ადგილობრივი დროით) და წარმომიდგენია, "მანჩესტერ იუნაიტედის" რამდენი გულშემატკივარი დაგვიჭერს მხარს.

"სტოკს" "იუნაიტედის" დამარცხება სურს, მაგრამ ჩვენ კარგი სერიის შენარჩუნება გვინდა, სამი ქულის აღებას ვაპირებთ, თუ შესაძლებელი იქნება და მერე "მანჩესტერ სიტისა" და "ტოტენჰემის" მატჩს დაველოდებით, სადაც ერთ-ერთი ან ორივე მათგანი დაკარგავს ქულებს. თუმცა, კარგი მხოლოდ მაშინ იქნება, თუ ჩვენს მატჩს მოვიგებთ".

"სტოკის" ბოლოდროინდელი შედეგი დიდწილად პიტერ კრაუჩის კარგ ფორმაზეა დაფუძნებული, რომელიც, დიდი ალბათობით, სასტარტო შემადგენლობაში იქნება. მაღალმა ინგლისელმა ბოლო სამ მატჩში სამი გოლი გაიტანა და ახლა პრემიერ ლიგაში მე-100 გოლის გატანას უმიზნებს.

"ვფიქრობ, მის წინააღდეგ ძალიან რთულია თამაში. ერთი ფეხბურთელი მას ვერ შეაჩერებს, პიტერ კრაუჩის შეჩერება გუნდმა უნდა შეძლოს. ვიცით, რომ, როცა საჯარიმოშია და შესაბამის სამსახურს უწევენ, ძალიან რთულია - თუ შეუძლებელი არა - მისი შეჩერება. ამიტომ, გუნდური ძალისხმევა უნდა იყოს, ჩვენ კონტროლს და მის შეჩერებას ვეცდებით."

წყარო: manutd.com