დავიდ დე ხეა აღნიშნავს, რომ "მანჩესტერ იუნაიტედი" არ აპირებს რომელიმე კონკრეტული ტურნირისთვის უფრო მეტი მნიშვნელობის მინიჭებას, ვიდრე სხვისთვის და გუნდი ყველა ტიტულისთვის ერთნაირად იბრძვის.

პრემიერ ლიგაში ამჟამად მეექვსე ადგილზე მყოფ "იუნაიტედს" კარგი შანსი აქვს, რომ მიმდინარე სეზონი ტიტულის მოგებით დაასრულოს, რამეთუ გუნდი ინგლისის თასის მეოთხე რაუნდში გავიდა, ლიგის თასის ფინალამდე ერთი მატჩი აშორებს და ევროპა ლიგის პლეი-ოფ რაუნდშიც გააღწია.

დე ხეას "იუნაიტედთან" ერთად ერთხელ აქვს მოგებული პრემიერ ლიგა, ერთხელ ინგლისის თასის და სამჯერ ქომუნითი შილდი, ესპანელს კი უფრო მეტი წარმატების მიღწევა სურს.

"ოთხ ტურნირზე ვართ და ყველა ტიტულისთვის უნდა ვიბრძოლოთ. ჩვენ "მანჩესტერ იუნაიტედი" ვართ.

ლიგის თასის ფინალს მივუახლოვდით, რომელიც "უემბლიზე" გაიამართება და ამისთვის მზადება შაბათს "სტოკთან" მატჩით უნდა დავიწყოთ.

გამარჯვებების სერიის შენარჩუნება გვსურს. კარგ სერიას ვაჩვენებთ და ამავე დონეზე უნდა დავრჩეთ, ბევრი თამაშის მოგება ვცადოთ და მერე გამოჩნდება, რომელ ადგილს დავიკავებთ ჩემპიონატში".

"იუნაიტედს" ყველა ტურნირზე თავისი ზედიზედ მეათე გამარჯვების მოპოვებაში "ლივერპულმა" შეუშალა ხელი. მიუხედავად იმისა, რომ გუნდი მატჩის მიმდინარეობისას მარცხდებოდა და მხოლოდ შეხვედრის მიწურულს მოახერხა ანგარიშის გათანაბრება, დე ხეა იმედგაცრუებულია შედეგით და თანაგუნდელებს "სტოკთან" სიტუაციის გამოსწორებისკენ მოუწოდებს.

"ამ მატჩით იმედგაცრუებული ვიყავით, რადგან გამარჯვება გვინდოდა. სახლში ჩვენი გულშემატკივრების წინაშე ვთამაშობდით და ვფიქრობ, გამარჯვება დავიმსახურეთ. ბევრი შანსი შევქმენით, მეტი, ვიდრე მათ, ამიტომაც ცოტა იმედგაცრუებულნი ვართ.

"სტოკთან" რთული მატჩი გვექნება, იქ გასვლაზე თამაში ადვილი არასდროს არის. ქარიანი ადგილია, ყოველთვის ომის გადატანა გიწევს. მაგრამ თავდაჯერებულები უნდა ჩავიდეთ, ჩვენი საუკეთესო ფეხბურთის თამაში ვცადოთ და მოვიგოთ."

წყარო: skysports