ფილ ჯონსის თავდადებული თამაში, რაც მთელი სხეულის გამოყენებას გულისხმობს თავდაცვისას, მათ შორის მიწაზე დადებულ ბურთზე თავით თამაშსაც, "მანჩესტერ იუნაიტედის" გულშემატკივართა ერთ-ერთი სასიამოვნო მოსაგონარია.

24 წლის მცველი ხანგრძლივი ტრავმის მოშუშების შემდეგ გუნდის განუყოფელი ნაწილი გახდა და მიმდინარე სეზონში უკვე ჩაატარა 14 მატჩი, რაც ერთით მეტია, ვიდრე 2015/16 წლების სეზონში ჩატარებული მატჩების რაოდენობა. არავითარი შეცდომა, ის ჟოზე მოურინიოს გუნდის მნიშვნელოვანი ნაწილია.

ჟურნალ Inside United-თან ინტერვიუში ჯონსმა გუნდში წარმატებულ დაბრუნებაზე, მწვრთნელთან ურთიერთობაზე, ზლატან იბრაჰიმოვიჩის წინააღმდეგ თამაშსა და, რა თქმა უნდა, თავდაცვაში მოქმედებით თავის სიამაყეზე ისაუბრა.

როცა ჰკითხეს, თანამედროვე ფეხბურთში მცველების წვლილი შეუმჩნეველი ხომ არ არის, ჯონსმა უპასუხა: "როგორც მცველებს, არ გვაღელვებს. მე უბრალოდ თავდაცვა მიყვარს! მინდა, ბურთს ბადეში გახვევის საშუალება არ მივცე. მინდა, დავიდ დე ხეამ უფრო ნაკლები სეივი განახორციელოს ან მთელი მატჩის განმავლობაში საერთოდ არ მოუწიოს. ვფიქრობ, კარგად ვუგებთ ერთმანეთს.

"როცა გუნდურად ვიცავთ თავს, უკეთესად გამოგვდის, მაგრამ პროგრესირება არ უნდა შევწყვიტოთ. მნიშვნელოვანი ბლოკის განხორციელება გოლის გატანას ჰგავს. ბადეში ბურთის გახვევა თავდამსხმელის საქმეა, ჩვენ კი მნიშვნელოვანი წართმევებისა და ბლოკის განხორციელება გვევალება".

მას შემდეგ, რაც ტრავმის გამო ჯონსმა და მარკოს როხომ სეზონის სტარტი გამოტოვეს, წყვილი დაცვის ცენტრში ერთმანეთს კარგად შეეგუა. ინგლისელს მიაჩნია, რომ ასეთი პარტნიორობის დამყარებას მსგავს პირობებში ყოფნამ შეუწყო ხელი, როცა კრის სმოლინგი და ერიკ ბაიი უქმობდნენ.

"დიახ, ასე მგონია. ორივე ერთნაირ ვითარებაში ვიმყოფებოდით, რაც დაგვეხმარა. მაგრამ ფეხბურთი უცნაური თამაშია, ერთი წუთში ჩართული ხარ, მეორე წუთში ეთიშები. ყოველთვის, როცა მაისურს ირგებ, ისე უნდა ითამაშო, რომ მისი მეორედ მორგების გარანტიაც გქონდეს. აი, ამას ვცდილობ მე და მომავალშიც ამას ვეცდები".

ფორმის აღდგენა და შენარჩუნება, გუნდში ადგილის დამკვიდრება, ჯონსისა და მოურინიოს ურთიერთობის შედეგიცაა. "ბრწყინვალეა. ჩემდამი დიდ რწმენას ავლენს და იმედი მაქვს, ამას გადავუხდი.

ყოველთვის კარგია მწვრთნელისგან და სხვა ადამიანებისგან იმის მოსმენა, რომ კარგად თამაშობ. არავითარი ილუზია არ მაქვს, საერთოდ. ამ თამაშში ერთ წუთში მწვერვალზე ხარ, მეორე წუთში ძირს ეცემი, ამიტომ პროგრესირება არ უნდა შევწყვიტო".

წყარო: manutd.com