"მანჩესტერ იუნაიტედის" მთავარი მწვრთნელი ჟოზე მოურინიო ფიქრობს, რომ "ლივერპულმა" "ოლდ ტრაფორდზე" გამართულ მატჩში სწორი გათვლები გააკეთა და ამის დამსახურებით აიღო ერთი ქულა.
მატჩის წინ იურგენ კლოპმა მოსაზრება გამოთქვა, რომ "იუნაიტედი" დაცვით თამაშს აირჩევდა, რაც მიმდინარე სეზონის პირველი წრის მატჩში მოხდა, მაგრამ საბოლოო ჯამში სწორედ მისი გუნდი თამაშობდა ძირითადად დაცვიდან, რასაც ჯეიმს მილნერის მიერ პირველ ტაიმში გატანილმა გოლმაც შეუწყო ხელი.
მოურინიო მოხარულია, რომ მისმა გუნდმა მედგრობა გამოიჩინა და მეტოქის დაცვის გარღვევა მოახერხა, თუმცა ნაჩვენები ფეხბურთის ხარისხმა არ დააკმაყოფილა.
"ძალიან დაძაბული მატჩი იყო, არანეიტრალური გულშმატკივრისთვისაც კი - "ლივერპულის" ფანები და ჩვენი ფანები ბოლო წამამდე დამუხტულები იყვნენ. მაგრამ არ ვფიქრობ, რომ თამაშის ხარისხი სუპერი იყო.
არც "ლივერპულს", არც ჩვენ არ გამოგვივლენია მთელი უნარი, მაგრამ ძალიან ემოციური, აქტიური და აგრესიული თამაში იყო. ბოლო წამამდე ვიბრძოდით.
ჭკვიანი მეტოქე გვყავდა. არ ჩქარობდნენ, იცოდნენ, როგორი ფეხბურთი ეთამაშათ და ეკონტროლებინათ თამაშის ემოციები. იცოდნენ, რომ ბოლო წუთებში პრობლემებს შევუქმნიდით.
ჩვენ შემტევი გუნდი ვიყავით, "ლივერპული" კი დამცველი. უნდა გადავხედო, კრიტიკოსები მართლები არიან თუ არა. მატჩისგან სიამოვნება მივიღე, მაგრამ, რა თქმა უნდა, იმედგაცრუებული ვარ, რომ სამი ქულა ვერ ავიღეთ", - განაცხადა "იუნაიტედის" მწვრთნელმა.