პოლ პოგბა ფიქრობს, რომ ფეხბურთელების კავშირმა და კომბინაციამ განაპირობა "მანჩესტერ იუნაიტედის" 9-მატჩიანი გამარჯვებათა სერია.

მიმდინარე სეზონის დასაწყისში პრემიერ ლიგაში ფრეების სერიის შემდეგ "წითლებმა" ბოლო პერიოდში შთამბეჭდავი ფორმა აჩვენეს. კარგი თამაში გუნდს სეზონის უმეტეს ნაწილში ჰქონდა, მაგრამ ბოლო კვირებში ჟოზე მოურინიოს შეგირდებმა თამაშს კარგი შედეგიც შემატეს.

პოგბას მიაჩნია, რომ ექვსი თვის განმავლობაში ერთად ყოფნამ გუნდში თავისი შედეგი გამოიღო და იმედი აქვს, რომ მისი თანაგუნდელები თანმიმდევრულობის შენარჩუნებას შეძლებენ.

"ვფიქრობ, ეს იმის დამსახურებაა, რომ ერთმანეთს ახლა უკეთ ვიცნობთ, გარკვეული პერიოდია ვთამაშობთ ერთად და მოედანზე კავშირი და კომბინაცია გვაქვს.

მაგალითად, ვიცი, როგორ ვიპოვო ზლატანი, მარსიალი, რეშფორდი... ერთად ექვსი თვის განმავლობაში ვიმყოფებით და ჯგუფი უფრო კომპაქტურად გამოიყურება, მე ვიტყოდი, რის საფუძველზეც ჩანს, რომ შედეგები მოდის.

ყველაფერი სწორი მიმართულებით ვითარდება და ჩვენც სწორედ ეს გვინდა. რთულია, როცა ახალ ფეხბურთელს იმატებ, რადგან ინგლისურ ფეხბურთსა და ყველაფერ აქაურს უნდა შეეგუოს. ეს უკვე მოხდა და ახლა დიდებულად ვაკეთებთ საქმეს", - განაცხადა ფრანგმა.

პოგბასა და იბრაჰიმოვიჩის კავშირმა უკვე გამოიწვია რამდენიმე მნიშვნელოვანი გოლი. როცა ჰკითხეს, ასე კარგად როგორ მოქმედებენ ერთად, ნახევარმცველმა უპასუხა: "არ ვიცი. როგორც უკვე ვთქვი, მისი პოვნა მიადვილდება. იბრას ყველაფერი აქვს. სრულყოფილი თავდამსხმელია. შეგიძლია ბურთი მისცე, მას დაიჭერს, სივრცეს იპოვის, დიდებული უნარები აქვს, თავით კარგად თამაშობს, მომენტს ასრულებს, დიდი და ძლიერია... ამიტომ მის პოვნას ვცდილობ.

მომწონს მისი სათამაშო სტილი და ვფიქრობ, მასაც მოსწონს ჩემი სტილი. ეს უბრალოდ მოედანზე დამყარებული კავშირია, ვარჯიშებზე სულაც არ ვამუშავებთ, უბრალოდ ასე ხდება".

წყარო: manutd.com