ხუან მატამ განაცხადა, რომ ჟოზე მოურინიო უკმაყოფილო იყო "ჰალ სიტისთან" მატჩის პირველ ტაიმში "მანჩესტერ იუნაიტედის" მიერ ნაჩვენები ტემპით.

"იუნაიტედი" პირველ 45 წუთში დომინირებდა, მაგრამ "ჰალის" დაცვის გარღვევას ვერ ახერხებდა და ძირითადად შორეულ დარტყმებს მიმართავდა, რაც უშედეგოდ სრულდებოდა.

სანამ მატა 56-ე წუთზე ანგარიშს გახსნიდა, მოურინიომ ენტონი მარსიალი და ჯესი ლინგარდი გაგზავნა მოედნის კიდესთან გასახურებლად.

როცა ესპანელს მატჩის შემდეგ ჰკითხეს, თუ რა უთხრა მოურინიო შესვენებაზე, მან უპასუხა: "რომ უფრო სწრაფად უნდა გვეთამაშა, უფრო მეტი ტემპი შეგვეტანა თამაშში, ძირითადად ეს.

ცოტა უფრო მეტი შანსი უნდა შეგვექმნა, პირველ ტაიმში ნაადრევი გოლის გასატანად გვქონდა საკმარისი შანსები. მეორე ტაიმში მოვახერხეთ და 2-0 კარგი შედეგია, მაგრამ ჯერ არაფერი გადაწყვეტილა".

გამეორებებმა აჩვენა, რომ მატას ფეხი თამაშგარე მდგომარეობაში ჰქონდა, მაგრამ გასულ თვეში "კრისტალ პალასთან" უსამართლოდ არ ჩათვლილი გოლით წაქეზებული ხუანი ამას თავისი სიტყვებით გამოეხმაურა.

"როცა დავინახე, რომ მიკი საჰაერო ორთაბრძოლას იგებდა, მეორე ძელთან გადავედი და ბურთი ბადეში მოვათავსე. იყო შემთხვევები, როცა გოლები წესების დაცვით გაგვქონდა, მაგრამ თამაშგარეს გვიფიქსირებდნენ, ეს ხომ ფეხბურთია. მსაჯებისთვის ძალიან რთულია განსაზღვრა, მაგრამ საბენდიეროდ, გოლი ჩაითვალა.

"უემბლისკენ" პირველი ნაბიჯი გადაიდგა. საპასუხო მატჩი რთული იქნება, საკუთარ სტადიონზე საკუთარი გულშემატკივრების დახმარებით ზეწოლას მოახდენენ, მაგრამ კარგი შედეგი მივიღეთ, გოლი არ გავუშვით, რაც მნიშვნელოვანია".

წყარო: M.E.N.