"მანჩესტერ იუნაიტედის" მთავარმა მწვრთნელმა ჟოზე მოურინიომ დაადასტურა, რომ მორგან შნეიდერლინი მალე "იუნაიტედს" დატოვებს და "ევერტონში" გადავა.
როცა სამშაბათს საღამოს ფრანგი ნახევარმცველის მომავლის შესახებ ჰკითხეს, პორტუგალიელმა უპასუხა: "დელატები არ ვიცი, მაგრამ მატჩის დაწყებამდე მისტერ ვუდვორდმა მაცნობა, რომ არსებული სიტუაციით, მორგანი "ევერტონში" თითქმის გადასულია".
მატჩის შემდგომ პრესკონფერენციაზე კი დაამატა: "მოწყენილი და ბედნიერი ვარ. მოწყენილი ვარ, რადგან მორგანი მომწონს და ხანგრძლივ სეზონში ჩვენი ერთ-ერთი არჩევანი შეიძლებოდა ყოფილიყო. ბედნიერი ვარ, რადგან ეს ის არის, რაც მას სურდა, მას ყველა მატჩში სურს მონაწილეობის მიღება და უნდა, რომ გუნდში მნიშვნელოვანი ფეხბურთელი იყოს.
თუ ეს ის არის, რაც მას სურს, ბედნიერი ვარ ამ ძალიან კარგი პროფესიონალის გამო და მის შესახებ მხოლოდ დადებითი სიტყვების თქმა შემიძლია".