დეილი ბლინდი აცხადებს, რომ "მანჩესტერ იუნაიტედის" თითოეულ ფეხბურთელს მიუძღვის წვლილი გუნდის ბოლო დროინდელ წარმატებაში, განურჩევლად იმისა, ძირითადი შემადგენლობის წევრები არიან თუ არა.

ჟოზე მოურინიომ ცხრა ცვლილება განახორციელა "რედინგთან" მატჩში წინა შეხვედრასთან შედარებით, თუმცა ამას გუნდისთვის 4-0 გამარჯვებაში ხელი არ შეუშლია.

ბლინდის თქმით, გუნდში კონკურენტუნარიანობა "იუნაიტედს" მხოლოდ ეხმარება წარმატების მიღწევაში, რაც უკვე რვამატჩიან მოგებათა სერიას ითვლის.

"ყველა მზად არის, როცა საჭირო არიან და ეს გუნდისთვის მნიშვნელოვანია, რადგან ამას ყველა აკეთებს და ყველა გვჭირდება.

ვიცით, რომ ზედიზედ რვა გამარჯვება გვაქვს მოპოვებული, მაგრამ არც ის გვავიწყდება, რომ ამისთვის შემთხვევით არ მიგვიღწევია. ბევრს ვშრომობთ, ყველა სავარჯიშო სესიაზე და გუნდური სულისკვეთება ძალიან კარგია. ჩვენზეა დამოკიდებული წარმატების გზის შენარჩუნება.

დიდი გუნდი გვყავს და ყველა იბრძვის მასში მოსახვედრად, ყველას უკეთესობა სურს. ყველა სავარჯიშო სესიაზე დიდი კონკურენცია შეიმჩნევა, რაც გუნდს უკეთესს ხდის", - განაცხადა ბლინდმა.

წყარო: manutd.com