"მანჩესტერ იუნაიტედის" მთავარმა მწვრთნელმა ჟოზე მოურინიომ განაცხადა, რომ მემფის დეპაის იმედი აღარ აქვს, რადგან ჰოლანდიელმა კლუბის დატოვების სურვილი გამოთქვა.

22 წლის ფეხბურთელმა მიმდინარე სეზონში მხოლოდ ერთი მატჩი ჩაატარა "იუნაიტედის" სასტარტო შემადგენლობაში და ისიც ლიგის თასზე, ხოლო პრემიერ ლიგის მატჩებში იგი მხოლოდ შეცვლაზე შესვლის შედეგად თამაშობდა და ჯამში მოედანზე სულ 20 წუთი გაატარა.

"ოლდ ტრაფორდზე" შეკრებილმა გულშემატკივარმა ჰოლანდიელი მოქმედებაში ბოლოს 24 ნოემბერს, ევროპა ლიგის მატჩში "ფეიენოორდის" წინააღმდეგ იხილა. მოურინიოს განმარტებით, ვინგერის დატოვება შემადგენლობის მიღმა იმით არის გამოწვეული, რომ მემფისმა მწვრთნელს კლუბის დატოვების ნებართვა სთხოვა.

"გასულ სეზონში არ იყო ისეთი მომენტი, რომ კარგად ეთამაშა, წელს კი საერთოდ ვერ თამაშობს. მემფისთან დაკავშირებით ჩემ მიერ ბოლო პერიოდში მიღებული გადაწყვეტილებები იმის შეგრძნებითა და ინფორმაციით იყო მიღებული, რომ იანვარში წასვლა სურს. რეალური წინადადება გვქონდა, რომლის მიღებაც შეგვეძლო.

თუკი ვიცი ან ვგრძნობ, რომ ფეხბურთელს წასვლა უნდა, ლინგარდს, მხითარიანს ან მარსიალს, ანუ იმ ფეხბურთელებს მივმართავ, ვის ჩვენთან დარჩენაშიც 100 პროცენტით ვარ დარწმუნებული", - განაცხადა მოურინიომ.