ჟოზე მოურინიოს მიაჩნია, რომ "მანჩესტერ იუნაიტედს" მუხტი აქვს დაჭერილი გამარჯვებათა სერიით, რომელიც მისმა გუნდმა აჩვენა და ამ სერიის გაგრძელებას დღეს ძველი მეგობრის, აიტორ კარანკას გუნდის წინააღმდეგ ეცდება.
"წითლებმა" ყველა ტურნირზე ჩატარებულ ბოლო 5 მატჩში ქულათა მაქსიმუმი აიღეს და პრემიერ ლიგაში ზედიზედ მეხუთე გამარჯვების მოპოვებას ეცდებიან, როცა "ოლდ ტრაფორდზე" მე-15 ადგილზე მყოფი "მიდლსბრო" ჩავა.
ახალი წლის წინა საღამოს გასამართი მატჩის წინ მოურინიომ განაცხადა: "კარგად თამაში დიდი ხანია გამოგვდის. რთულად მახსენდება მატჩი, სადაც კარგად ვერ ვითამაშეთ.
ბევრი მატჩი ჩავატარეთ კარგად, მიუხედავად იმისა, რომ ისეთი შედეგები ვერ მივიღეთ, როგორიც კარგ თამაშს უნდა ახლდეს.
მაგრამ რეალობა ის არის, რომ პრემიერ ლიგის ბოლო 4 და საერთო ჯამში ბოლო ხუთ მატჩში გავიმარჯვეთ და ახლა ქულები გვჭირდება, ასე რომ, მოდით კიდევ სამი ავიღოთ ჩვენი გულშემატკივრებისთვის. ფეხბურთის სათამაშოდ კარგი დღეა, წლის ბოლო დღე, ასე რომ, მოდი ვცადოთ".
მოურინიო პირველად დაუპირისპირდება თავის ყოფილ ასისტენტს და მიუხედავად იმისა, რომ კარანკასთან მას მეგობრული ურთიერთობა აქვს, მომდევნო მატჩში მის წარმატებას ნამდვილად არ ისურვებს.
"ჩემი მეგობარია, ნამდვილი მეგობარი. ყოველთვის მისი გამარჯვება მსურს, მასაც ყოველთვის ჩემი გამარჯვება სურს, მაგრამ ეს პირველი შემთხვევა იქნება, როცა მეც მინდა მოგება და მასაც.
ხანდახან ძმები უპირისპირდებიან ერთმანეთს, ხანდახან მამა და შვილი, როცა მამა მწვრთნელია, შვილი კი ფეხბურთელი, ეს კი უფრო რთულია. მთელი 90 წუთის განმავლობაში კი მას გამარჯვება ენდომება და მეც ასევე".