2002 წელს "სანდერლენდი" "აიაქსთან" ზლატან იბრაჰიმოვიჩის შეძენის თაობაზე მოლაპარაკებებს აწარმოებდა.

როგორც უკვე ვიცით, შვედი მხოლოდ 35 წლის ასაკში გადავიდა პრემიერ ლიგაში და ჯერჯერობით შესანიშნავ ფეხბურთს აჩვენებს.

თუმცა მას გაცილებით ადრე შეეძლო ინგლისში თამაში - 2002 წელს "შავ კატებს" სურდათ მისი მიწვევა საკუთარი გუნდის რიგებში, რათა კევინ ფილიპსისთვის პარტნიორობა გაეწია.

"მიგვანიშნეს, რომ "აიაქსში" თავს კარგად ვერ გრძნობდა. გუნდში კი ორი შვედი გვყავდა - სტეფან შვარცი და იოაჰიმ ბიერკლუნდი - მახსოვს, სტეფანმა ყველაზე კარგად იცოდა, რომ ზლატანი კლუბის გამოცვლას აპირებდა.

სასაცილოა, რომ როცა "ამსტერდამ არენაზე" შესახვედრად მივედით, იბრაჰიმოვიჩმა გვერდით ჩაგვიარა სავარჯიშოდ როცა მიდიოდა. მე და პიტერ რიდი გვიცნო.

ბენჰაკერთან საუბრისას გვაცნობეს, რომ ზლატანის გაყიდვას არ აპირებდნენ. თუმცა, ჩვენ მაინც შევთავაზეთ სამი მილიონი ფუნტი. ბენჰაკერმა წინადადება არ მიიღო, მაგრამ დიალოგი გავაგრძელეთ და ჩვენს პრეზიდენტს, ბობი მიურეის დავურეკე. მითხრა: "თუ ფიქრობ, რომ ერთი ზედმეტი მილიონის ხარჯზე მოლაპარაკება შედგება, უკან არ დაიხიო".

მის ინსტუქციებს ყურადღება არ მივაქციე და ჩვენი შეთავაზება კიდევ ორი მილიონით გავზარდე - 5 მილიონს ფუნტს პლუს გარკვეული თანხა. შეთანხმების მიღწევა გვინდოდა და გვჯეროდა, რომ ფეხბურთელს ჩვენთან გადმოსვლა სურდა", - იხსენებს "სანდერლენდის" ყოფილი სპორტული დირექტორი მარკ ბლექბორნი.

"შავი კატების ყოფილი მწვრთნელი პიტერ რიდი კი აცხადებს: "სიმართლე რომ ვთქვათ, მაშინ "აიაქსი" გაცილებით ცნობილი კლუბი იყო. პრემიერ ლიგა არც ისეთი ძლევამოსილი იყო, როგორიც ახლაა. მაღალი ცენტრალური თავდამსხმელები ყოველთვის მომწონდა, ზლატანის შემთხვევაში კი ტექნიკურად დაჯილდოებულ ფეხბურთელთან გვქონდა საქმე. დარწმუნებული ვიყავი, რომ მისი შეძენის შანსი გვქონდა".