"მანჩესტერ იუნაიტედის" მთავარი მწვრთნელის პოსტიდან დათხოვნის შემდეგ დევიდ მოიესი ხვალ პირველად დაუბრუნდება "ოლდ ტრაფორდს", სადაც მან 10 თვე გაატარა.

მატჩის წინა პრესკონფერენციაზე კი განაცხადა, რომ არ ნანობს "იუნაიტედში" გატარებულ დროს და შანსი რომ ჰქონდეს, ამ სამუშაოს კიდევ ერთხელ მოკიდებდა ხელს.

"არა, არა, არაფერს ვნანობ. მხოლოდ იმაზე მწყდება გული, რომ უფრო მეტი დრო არ მომცეს. მაგრამ მგონია, რომ ადამიანთა უმრავლესობა, მეც კი, წარსულს თუ გადახედავს, იტყვის, რომ ვისაც არ უნდა შეეცვალა სერ ალექსი, მისთვის ადვილი გასეირნება არ იქნებოდა. იქნებოდა ეს ჟოზე, კარლო ანჩელოტი, იურგენ კლოპი, პეპ გვარდიოლა თუ დევიდ მოიესი, ვფიქრობ, რომ რთული სამუშაო ექნებოდა, ვინც ჩაიბარებდა.

უსამართლოდ მომექცნენ. ვინც არ უნდა მოსულიყო, გაუჭირდებოდა და ვისაც არ უნდა დაეკავა ეს პოსტი, გუნდის გადასაწყობად დრო სჭირდებოდა. "მანჩესტერ იუნაიტედს" შესანიშნავი ფეხბურთელები ჰყავდა, შესაძლოა, 1-2 მოთამაშე იყო, რომელთა კარიერაც დასასრულს უახლოვდებოდა. გუნდს ცოტა გარდაქმნა სჭირდებოდა, ეს კი არასდროს ხერხდება ერთი გაელვებით", - განაცხადა მოიესმა.

"სანდერლენდის" მთავარ მწვრთნელს ჰკითხეს, იმუშავებდა თუ არა ასეთ რთულ სამუშაოზე კიდევ ერთხელ, რაზეც უპასუხა:

"100 პროცენტით. ძალიან ცოტა ადამიანი თუ იღებს "მანჩესტერ იუნაიტედში" სამუშაო ადგილს, მე კი ამის ღირსი გავხდი. "მანჩესტერ იუნაიტედმა" რომ მიგიწვიოს სამუშაოდ, გარკვეულ დონეს უნდა შეესაბამებოდე.

ახლა ძალიან კარგი მწვრთნელი ჰყავთ, ადრე კი ისეთი გამოცდილი მწვრთნელი ჰყავდათ, როგორიც ლუი ვან გაალია და მიმაჩნია, რომ თითოეული მათგანი გეტყოდათ, რომ "მანჩესტერ იუნაიტედი" სულ სხვა დონეა, იმათთან შედარებითაც კი, სადაც მათ მანამდე უმუშავიათ.

რა თქმა უნდა, იმედგაცრუებული ვარ, რომ ჩემი კონტრაქტის ბოლომდე ამოწურვის საშუალება არ მომეცა, მაგრამ ძალიან გამიმართლა, რომ დიდებულ ფეხბურთელებთან ვიმუშავე და ვიხილე, რას ნიშნავს უმაღლეს დონეზე მუშაობა. ყველაზე მთავარი ისაა, რომ "მანჩესტერ იუნაიტედში" სიამოვნებით ვმუშაობდი და ეს მართლაც დიდებული კლუბი იყო."