"მანჩესტერ იუნაიტედის" მთავარმა მწვრთნელმა ჟოზე მოურინიომ განაცხადა, რომ ზლატან იბრაჰიმოვიჩი მის გუნდში შეუცვლელ ფიგურად იქცა.

"ოლდ ტრაფორდზე" კარიერის დასაწყისში პორტუგალიელმა სპეციალისტმა ცხადყო, რომ მის გუნდში ხელშეუხებელი ფეხბურთელები არ არიან, მაგრამ მან უკვე შეიცვალა აზრი და ასეთად იბრაჰიმოვიჩი მიაჩნია, რომელმაც შესაძლო 26 მატჩიდან 24 ჩაატარა.

თუმცა მოურინიოს ესმის, რომ გარკვეულ მომენტში 35 წლის ფეხბურთელისთვის დასვენების საშუალების მიცემა მოუწევს, მანამდე კი "ვესტ ბრომვიჩთან" აუცილებლად ათამაშებს.

"შემიძლია თუ არა ვთქვა, რომ მისი დატოვება შემადგენლობის მიღმა შეუძლებელი გახდა? დიახ, ასეა.

სხვა პოზიციებზე შეგიძლია თავს გაუფრთხილდე და გამოცდილების ხარჯზე ითამაშო, მაგრამ თავდასხმაში ეს შეუძლებელია, იქ ვერ დაიმალები. ამ მხრივ ფენომენალურია. ხვალაც ითამაშებს, რის შემდეგაც ერთი კვირით დაისვენებს.

საერთოდ არ მიკვირს, რომ ამას ახერხებს, ვიცოდი მისი ფიზიკური შესაძლებელობები, მაგრამ ნათელია, რომ ისიც კი ვერ ჩაატარებს 60 მატჩს. უნდა დავასვენო. გარკვეულ მატჩში მისი შემადგენლობის მიღმა დატოვება მომიწევს.

"არსენალთან" მატჩში დისკვალიფიცირებული იყო და ამიტომ არ ითამაშა. ევროპა ლიგის ზოგიერთ მატჩში სათადარიგოთა სკამზე მოხვდა, ასევე "ნორთჰემპტონთანაც", ამიტომ ისევ ვეცდები მისთვის დასვენების საშუალების მიცემას.

მაგრამ თავდასხმაში ჩვენი მთავარი საყრდენია და მხოლოდ ის არის ასეთი. ჩვენი ნორმალური თამაშისთვის გვჭირდება", - განაცხადა მოურინიომ.

წყარო: theguardian