მაიკლ კერიკს მიაჩნია, რომ ზლატან იბრაჰიმოვიჩის გოლი "მანჩესტერ იუნაიტედისთვის" დიდებულ მომენტად შეიძლება იქცეს.

პოლ პოგბას მიერ "სელჰერსტ პარკზე" ანგარიშის გახსნის შემდეგ "კრისტალ პალასმა" წონასწორობა მეორე ტაიმში აღადგინა, მაგრამ იბრაჰიმოვიჩმა მატჩის მიწურულს თავისი მე-14 გოლი გაიტანა მიმდინარე სეზონში და "წითლებს" სამი ქულა მოუპოვა.

კერიკს, რომელიც თავის მე-11 სეზონს ატარებს "იუნაიტედში", თავისი გამოცდილების ფონზე აღარ აკვირვებს მატჩის ბოლო წუთებზე გატანილი გამარჯვების გოლი და ამას მატჩის უკეთეს ემოციადაც მიიჩნევს.

"ძალიან კარგი გრძნობა და მატჩის მოგების საუკეთესო საშუალებაა. ემოცია, რომელსაც მატჩის მიწურულს გატანილი გოლისგან იღებ, განსაკუთრებულია და რაღაც უფრო მეტს ნიშნავს. სასიამოვნო იყო და ვისიამოვნეთ კიდეც.

დამსახურებულად გავიმარჯვეთ. არ ვამბობ, რომ ჩვენი საუკეთესო შეხვედრა იყო, მაგრამ მატჩის უმეტეს ნაწილს ჩვენ ვაკონტროლებდით. პირველ ტაიმში რამდენიმე შანსი შევქმენით, შემდეგ კი მატჩის მოკვლას ვაპირებდით, რათა საქმე უფრო იოლი ყოფილიყო. მაგრამ მათ შანსი გამოიყენეს და გაგვიტანეს.

ყოველთვის ვგრძნობდი, რომ გამარჯვება შეგვეძლო; ხანდახან ეს გრძნობა გაქვს. ზეწოლას ვახდენდით და ვგრძნობდით, რომ მოდიოდა. პოლმა დიდებული პასი გააკეთა და იბრამ დიდებულად შეასრულა. მატჩი მოვიგეთ".

რაც შეეხება თავად მატჩის მნიშვნელობას, კერიკს მიაჩნია, რომ სეზონზე ამან დიდი გავლენა შეიძლება იქონიოს: "ასეთი გამარჯვება დიდი მომენტია, არა მარტო მატჩში, არამედ სეზონშიც. თავს უკეთ გრძნობ და მომდევნო მატჩშსაც უკეთესი შეგრძნებით ხვდები.

არ გვინდა, ძალიან წინ დავაყენოთ ჩვენი თავი, რადგან ძალიან სახიფათოა, მაგრამ კვირების განმავლობაში ვამბობდით, რომ სიტუაცია გამოსწორების პირას იყო. მაგრამ შედეგს ვერ ვაღწევდით და ეს არ ჩანდა. ბოლო კვირა კი კარგი გამოდგა.

ყოველ წელს ამას ვამბობთ: ეს პერიოდი, როცა ბევრი მატჩი გვაქვს, დიდი პერიოდია და თუკი შობის პერიოდს კარგად ასრულებ, საკუთარ თავს რეალურ შანსს აძლევ. სეზონს იმაზე უკეთ თუ დავასრულებთ, ვიდრე დავიწყეთ, მაღალ პოზიციაზე გასვლის შანსიც გვექნება".

წყარო: manutd.com