ჰენრიხ მხითარიანი მოხარულია, რომ "მანჩესტერ იუნაიტედში" ჩატარებულ ბოლო მატჩებში თავისი შესაძლებლობების გამოვლენა შეძლო.

ორთვიანი უქმობის შემდეგ სომეხმა ფეხბურთელმა "წითლების" ბოლო ოთხი მატჩიდან სამში მიიღო მონაწილეობა და "ფეიენოორდსა" და "ვესტ ჰემთან" მოპოვებულ გამარჯვებებში საუკეთესო მოთამაშედ დასახელდა.

ამჯერად იგი ევროპის ლიგის ეგიდით "ზარიას" წინააღმდეგ თამაშის იმედს გამოთქვას, რაც დონეცკის "შახტიორში" ყოფნისას არაერთხელ გაუკეთებია.

"თამაში დავიწყე, ამიტომ პოზიტიურ განწყობაზე ვარ. მოხარული ვიქნები, თუკი მომავალში უფრო მეტი სათამაშო დრო მექნება, ამას წინასწარ ვერასდროს გამოიცნობ.

ნებისმიერი სიტუაციისთვის უნდა იყო მზად. მე ვიყავი და ვაჩვენე, რომ ტოპ მოთამაშე ვარ. მნიშვნელობა არ აქვს, ვითამაშებ თუ ვერა, გუნდის დასახმარებლად ყოველთვის მზად ვარ", - განაცხადა მხითარიანმა.

ჰენრიხმა ასევე ცხადყო, რომ პირველ გუნდში თავის დამკვიდრებამდე ჟოზე მოურინიო მას ხშირად ესაუბრებოდა.

"ამაზე ლაპარაკი არ მინდა, რადგან უკვე წარსულია, მაგრამ ჩვენ ხშირად ვსაუბრობდით. თავიდან, როცა აქ მოვედი, მითხრა, თუ რა უნდა გამეუმჯობესებინა. ვფიქრობ, დაინახა, რომ გავაუმჯობესე და ამ დროს კიდევ ერთი შანსი მომცა.

ძალიან რთული იყო მატჩებისთვის შორიდან თვალის დევნება, მაგრამ დავამტკიცე, რომ ძირითად გუნდთან ერთად თამაში შემიძლია. ახლა ამას გავიმეორებ და კვლავ დავამტკიცებ".

2010 წლიდან 2013 წლამდე "შახტიორში" ყოფნისას მხითარიანმა არაერთი მატჩი ჩაატარა "ზარიას" წინააღმდეგ და ბუნებრივია, რომ უკრაინული ჟურნალისტები მას ამის შესახებ ჰკითხავდნენ.

"უკრაინაში ყოფნა ყოველთვის სასიამოვნოა. ძალიან კარგი მოგონებები მაქვს. ოთხი საოცარი წელი გავატარე და ოდესაში ჩატარებული ჩემი ბოლო მატჩი გამორჩეული იყო, რადგან "შახტიორის" რიგებში ჩემი პირველი ჰეთ-ტრიკი გავიტანე, ასე რომ, მიხარია აქ დაბრუნება".

წყარო: manutd.com