"მანჩესტერ იუნაიტედის" მთავარი მწვრთნელი მოხარულია, რომ ევროპის ლიგის მატჩში ერიკ ბაიის გამოყენების საშუალება ექნება.

აფრიკელმა ფეხბურთელმა "ჩელსისთან" ოქტომბერში გამართულ მატჩში მიიღო ტრავმა და მას შემდეგ არ უთამაშია, თუმცა "ევერტონთან" შეხვედრაში სათადარიგოთა სკამზე მოხვდა. ბაიის დაბრუნებით მოურინიოს კიდევ ერთი არჩევანი ეძლევა დაცვის ცენტრში, სადაც ბოლო დროს ფილ ჯონსი და მარკოს როხო თამაშობენ.

"წითლებს" ერთი ქულა სჭირდებათ იმისათვის, რომ ჯგუფიდან გასვლა გაინაღდონ.

"მეტი არჩევანის ქონა გუნდისთვის მნიშვნელოვანია. ვფიქრობ, ჯონსი და როხო საოცრად თამაშობენ, მაგრამ ისინი ზედიზედ ყველა მატჩს ატარებენ.

ახლა ბაიი დაგვიბრუნდა, თუმცა ვიცით, რამდენიმე კვირაში დავკარგავთ, რადგანაც აფრიკის ეროვნულ თასზე მიდის. შობის პერიოდში, როცა ყოველ სამ დღეში მოგვიწევს თამაშის ჩატარება, ძალიან მნიშვნელოვანია დამატებით ერთი არჩევანის ქონა", - განაცხადა პორტუგალიელმა.

როცა მატჩის წინა პრესკონფერენციაზე იმ ფეხბურთელების შესახებ ჰკითხეს, ვინც მანჩესტერში დარჩნენ, მოურინიომ უპასუხა: "ფეხბურთელები, რომლებიც უნდა დამეცვა, მანჩესტერში არიან, ვინც ჩამოვიყვანე, სათამაშოდ ჩამოვიყვანე".

რაც შეეხება მატჩს, მოურინიომ დაამატა: "ჩვენთვის გადამწყვეტი მატჩია. თუ წავაგებთ, გავვარდებით. ჩვენ კი არ გვინდა გავარდნა, ტურნირზე ასპარეზობის გაგრძელებას ვაპირებთ. "ზარია" უკვე გავარდა, მაგრამ ერთი მატჩი აქვთ სათამაშო და დარწმუნებული ვარ, გამარჯვებას ეცდებიან.

დღეს ამ ტურნირზე ვართ, ხვალ მისი მოგება მოგვინდება და პლეი-ოფში გასვლა. რაც შეიძლება შორს უნდა წავიდეთ, ნაბიჯ-ნაბიჯ და პირველი ნაბიჯი რთულია, რაც ჯგუფიდან გასვლას გულისხმობს".

წყარო: manutd.com