"საუთჰემპტონი" მზადაა თავისი კაპიტანი ჟოზე ფონტე ზამთრის სატრანსფერო ფანჯარაზე გაყიდოს, თუკი სათანადო წინადადებას მიიღებს.

გასულ ზაფხულს ფონტე პორტუგალიის ნაკრებს ევროპის 2016 წლის ჩემპიონატის მოგებაში დაეხმარა, რის შემდეგაც მისდამი არნახული ინტერესი გამოავლინეს ევროპულმა კლუბებმა - მათ შორის "მანჩესტერ იუნაიტედმაც", რომლის მთავარი მწვრთნელი ფოტნეს თანამემამულე და სეხნია ჟოზე მოურინიოა.

The Guardian-ი იტყობინება, რომ "წმინდანებმა" ზაფხულში ერთი წინადადება მიიღეს თავისი ვეტერანის თაობაზე, მაგრამ 7.6 მილიონი ფუნტი, რომლის გადახდასაც "ევერტონი" აპირებდა, საკმარისი არ აღმოჩნდა.

მას შემდეგ "სენტ მერის" მკვიდრებმა არაერთხელ სცადეს 32 წლის მცველის დათანხმება ახალ კონტრაქტზე, მაგრამ უშედეგოდ. ფონტეს მოქმედი შეთანხმება მომდევნო სეზონის ბოლოს იწურება.

მოლაპარაკებებში პროგრესის უქონლობის გამო "საუთჰემპტონმა" თავის ფეხბურთელს აცნობა, რომ იანვარში მის თაობაზე მიღებულ წინადადებებს განიხილავს. კლოდ პიუელის გუნდს მხოლოდ 5 მლნ. ფუნტზე მეტის მიღება სურს, რაც პრემიერ ლიგის სხვა კლუბების ინტერესს გაზრდის.

არსებობს ყველა შანსი იმისა, რომ ფონტესადმი ინტერესს, განაახლებს "იუნაიტედი", მითუმეტეს, რომ მოურინიოსა და მას ერთი და იგივე აგენტი ჰყავთ ჟორჟე მენდეშის სახით.

წყარო: theguardian