ჟოზე მოურინიო თავის მიზნად პრემიერ ლიგის მოგებას ისახავს, მაგრამ მიაჩნია, რომ ლუი ვან გაალის ფილოსოფია მიზნის მიღწევაში ხელს უშლის.
გასულ კვირას "ვესტ ჰემთან" ნათამაშებმა ფრემ "იუნაიტედი" მეექვსე პოზიციაზე დატოვა და ლიდერ "ჩელსისთან" ჩამორჩენა 11 ქულამდე გაზარდა.
"წითელ ეშმაკებს" 2012/13 წლების შემდეგ არ მოუგიათ პრემიერ ლიგა, ამ პერიოდის განმავლობაში კი "ოლდ ტრაფორდზე" უკვე მესამე მწვრთნელი მუშაობს.
უკანასკნელი მათგანი ფიქრობს, რომ მისმა წინამორბედმა გუნდს დაუტოვა ფილოსოფია, რომლის შედეგსაც "იუნაიტედი" მიმდინარე სეზონში იმკის.
"ხანდახან, როცა მწვრთნელი ახალ გუნდს იბარებს, საქმისადმი მიდგომაში სხვაობა არც ისე დიდია. ამ შემთხვევაში მხოლოდ პატარა შეხება, ერთი თითის ანაბეჭდიც კი კმარა ახალი მწვრთნელისგან და ბევრ რამეს მიიღებ იმისგან, რაც უკვე იყო. ჩვენ კი სრულიად განსხვავებული რამის კეთებას ვცდილობთ.
ალბათ, უკეთესი შედეგები გვექნებოდა, სრულიად საპირისპირო მიმართულებით რომ არ მივდიოდეთ. ტაქტიკურ სისტემაზე არ მაქვს ლაპარაკი. მე ვსაუბრობ გუნდის თამაშზე, რაც ფეხბურთში ყველაზე რთულად შესაცვლელი რამაა", - განაცხადა "იუნაიტედის" მწვრთნელმა.