"მანჩესტერ იუნაიტედის" მთავარმა მწვრთნელმა ჟოზე მოურინიომ განაცხადა, რომ "წითელი ეშმაკების" დნმ-ის დაბრუნების პროცესშია.
მიუხედავად იმისა, რომ გუნდის შედეგები უკეთესის სურვილს ტოვებს, არ შეიძლება არ აღინიშნოს, რომ მოურინიოს ხელმძღვანელობით "იუნაიტედი" გაცილებით საინტერესოდ და სანახაობრივად თამაშობს, ვიდრე ლუი ვან გაალის თაოსნობისას.
ჟოზეს თქმით, "იუნაიტედის" საფირმო სათამაშო სტილის დაბრუნება მისი ერთ-ერთი მთავარი მიზანია, რასთან ერთად გუნდს წარმატებები დაუბრუნდება. "მე მხოლოდ ის მაღელვებს, თუ როგორ ვთამაშობთ. უნდა გვჯეროდეს იმისა, როგორც ვთამაშობთ და ამასთან ერთად შედეგების გაუმჯობესება ვცადოთ, მერე კი ვნახავთ, რას მოგვცემს ეს.
აქ მომავლის ასაშნებელად ვარ - მომავალი, რომელშიც გარკვეული დნმ, გარკვეული სტილი გვექნება. ჩემი სამუშაოს ერთ-ერთი ასპექტი ესაა, მაგრამ სხვებიც მაქვს. დანარჩენი მათგანი საფეხბურთო შედეგებს, მიზნებსა და დავალებებს ეხება.
ასე რომ, მხოლოდ ერთი რამ ბედნიერს ვერ გამხდის. საკუთარი თავისგან ბევრს მოვითხოვ, იმ ხალხისგანაც ბევრს მოვითხოვ, ვისთანაც ვმუშაობ, მოთამაშეებისგანაც და მომწონს, რომ კლუბიც ბევრს მოითხოვს ჩემგან. ამიტომ ვერ ვიტყვი, რომ მხოლოდ ამ ერთი ასპექტით ბედნიერი ვიქნები. უფრო მეტი მინდა.
სხვა გუნდების შედეგები არ მაღელვებს. ამჟამად ისეთ მდგომარეობაში ვართ, როცა "მანჩესტერ სიტის" და "ჩელსის" შედეგებზე ვერ ვიფიქრებთ. ჩემთვის სულერთია.
სახლში რვა ქულა დავკარგეთ, თუმცა ეს არ დაგვიმსახურებია. ამ რვა ქულით მესამე ადგილზე ვიქნებოდით, ლიდერებს უკან, ამიტომ ჩვენი პოზიცია არაფრის მთქმელია.
მოწინააღმდეგის ხაზებს შორის ვთამაშობთ, სულ წინ მივიწევთ, ჩვენი მცველები ძალიან მაღლიდან თამაშობენ. ცენტრალური მცველები ერთ ფეხბურთელს არ იცავენ, ზონალურად მოქმედებენ.
ფეხბურთში ბევრნაირი სტილი არსებობს. ჩვენ ჩვენს სტილს ვიცავთ. ყველა ამ ნიუანსს თუ გამოვასწორებთ და უფრო მეტ პრაგმატიზმს გამოვიჩენთ მეტოქის კართან და ჩვენს საჯარიმოში, ძალიან, ძალიან კარგები ვიქნებით.
ტაქტიკური თვალსაზრისით ამდენი ურთიერთწინაღობა არასდროს მქონია. ამჯერად სხვა მიმართულებით ვმოქმედებ, რაც რთული, მაგრამ სახალისოა. ძალიან მსიამოვნებს ამის კეთება და მზად ვარ", - განაცხადა პორტუგალიელმა მწვრთნელმა.
ინტერვიუები
8 კომენტარი
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.