ჟოზე მოურინიოს მიაჩნია, რომ "მანჩესტერ იუნაიტედის" წარმატება პრემიერ ლიგაში მხოლოდ დროის საკითხია, რადგანაც მისი გუნდი კარგად თამაშობს.
ლიგის თასზე "ვესტ ჰემის" დამარცხების შემდეგ მწვრთნელმა აღნიშნა, რომ მას არასდროს ჰყოლია გუნდი, რომელიც ამდენ მომენტს ქმნიდა. "წითლები" ევროპულ და შიდა სათასო მატჩებში კარგ შედეგს აჩვენებენ, მაგრამ ჩემპიონატში იგივე შედეგი არ არის, მიუხედავად დომინირებადი თამაშისა.
"ევერტონთან" მატჩის წინ მოურინიოს ჰკითხეს, შეძლებდა თუ არა მისი გუნდი "ჩაქუჩებთან" მიღწეული წარმატების გამეორებას.
"ყოველთვის ამას ველი, ჩვენ ხომ კარგად ვთამაშობთ. ხანდახან, როცა კარგად ვერ თამაშობ, იმედი გაქვს, რომ რაღაც მოხდება და გოლს გაიტან - სტანდარტული, კუთხური, შეცდომა, ინდივიდუალური მოქმედება.
მაგრამ ჩვენს შემთხვევაში ასე არ ხდება, რადგან ძალიან კარგად ვთამაშობთ და იმდენს ვქმნით, რომ ნორმალურ შემთხვევაში გოლები უნდა გადიოდეს და მატჩებს ვიგებდეთ. სათასო მატჩებში ამას ვაკეთებთ: ოთხი "ფეიენოორდთან", ოთხი "ფენერბაჰჩესთან", ოთხი "ვესტ ჰემთან". პრემიერ ლიგაში კი, გარდა "ლესტერთან" გატანილი ოთხი და "სუონსისთან" სამი გოლისა, მატჩები ფრედ ან ერთი გატანილი გოლით სრულდებოდა", - განაცხადა მოურინიომ.
"იუნაიტედი" თასის მატჩში მიღწეული წარმატების გამეორებას ამჯერად "გუდისონ პარკზე" ეცდება, სადაც მოურინიოს არც ისე სასიამოვნო მოგონებები აქვს. "ევერტონი" "ევერტონია". მე მარტინესის "ევერტონის", მოიესის "ევერტონის" წინააღმდეგ მითამაშია და ყოველთვის რთული იყო.
ყოველთვის მშვენიერი ატმოსფეროა დიდებული გულშემატკივრებითა და დიდებული სტადიონით, რომელიც ჩემი ქვეყნისთვის ისტორიულია, რამეთუ ეუსებიომ 1966 წლის მსოფლიო თასზე ოთხი გოლი გაიტანა იქ.
ბევრი დიდებული მატჩი ჩამიტარებია. რამდენიმე მათგანი წავაგე, რამდენიმე მოვიგე, მაგრამ ყოველთვის დიდებული მატჩები იყო. "იუნაიტედის" თამაშის სტილის შერწყმა "ევერტონის" მუდმივი სათაშო სტილის მცდელობასთან, ძალიან კარგ მატჩს გვპირდება".