ინგლისის ნაკრების სასტუმროში ალკოჰოლის მოხმარებასთან დაკავშირებული ინციდენტიდან რამდენიმე დღის შემდეგ, უეინ რუნიმ საფეხბურთო ასოციაციაში თავისი წარმომადგენლები გაგზავნა მის საპატივცემულოდ მატჩის ჩატარების საკითხზე.

რუნიმ ჯერ კიდევ ზაფხულში განაცხადა, რომ 2018 წლის მსოფლიო ჩემპიონატის შემდეგ სანაკრებო კარიერას დაასრულებს. მის ანგარიშზე ამჟამად 119 მატჩი და 53 გოლია "სამ ლომთა" რიგებში.

ინგლისის ნაკრების ყველა დროის საუკეთესო ბომბარდირს, მოედნის ფეხბურთელებს შორის ყველაზე მეტი მატჩის ჩამტარებელს და ინგლისის წლის საუკეთესო ფეხბურთელის ოთხგზის გამარჯვებულს მიაჩნია, რომ ასოციაციამ მას ღირსეული გაცილება უნდა მოუწყოს.

გასულ სამშაბათს უეინმა თავისი აგენტი პოლ სტრეტფორდი და იურისტი მარკ უიტლი FA-ს ოფისში გაგზავნა, რათა თავისი ღვაწლი შეეხსენებინა.

The Sun-ი იტყობინება, რომ 31 წლის ფეხბურთელის გეგმა ინგლისის ნაკრების მონაწილეობით საქველმოქმედო მატჩის ჩატარებასა და მუსიკალური კონცერტის ორგანიზებაში მდგომარეობს. ამ ორი ღონისძიების საშუალებით რუნის 5 მილიონი ფუნტის შეგროვების იმედი აქვს, რომელსაც ქველმოქმედებისკენ მიმართავს.

ხოლო იმ შემთხვევაში, თუ ამ ინიციატივას მხარს არ დაუჭერენ, უეინი ერთი ღამით "უემბლის" დაქირავებას ეცდება, რათა რუნის სიმბოლურ ნაკრებსა და დანარჩენი მსოფლიოს ნაკრებს შორის მატჩი გამართოს.