"მანჩესტერ იუნაიტედის" თავდამსხმელ ზლატან იბრაჰიმოვიჩს კიდევ ერთი ადგილის გამოძებნა მოუწევს სატიტულო ოთახში, შვედეთის წლის საუკეთესო ფეხბურთელი ზედიზედ მეთერთმეტეჯერ გახდა.

35 წლის ფეხბურთელი, რომელმაც სანაკრებო კარიერა ევროპის ჩემპიონატის შემდეგ დაასრულა, თავის სამშობლოში საუკეთესო ფეხბურთელად პირველად 2005 წელს აირჩიეს.

ამის შემდეგ, მხოლოდ 2006 წელს გახდა იმავე პრიზის მფლობელი სხვა ფეხბურთელი და ეს ფრედრიკ ლიუნბერგი გახლავთ, მაგრამ 2007 წლიდან წლის საუკეთესო შვედი ფეხბურთელის ჯილდო მხოლოდ იბრაჰიმოვიჩს გადაეცემოდა.

აღნიშნული მიღწევა შვედეთის რეკორდია და ადგილობრივი საფეხბურთო ასოციაცია "პარი სენ-ჟერმენის", "იუვენტუსის", "ბარსელონასა" და სხვა გრანდების ყოფილი ფეხბურთელისთვის სტოქჰოლმში "ფრიენდს არენის" მახლობლად იბრაჰიმოვიჩის ქანდაკების გაკეთებას აპირებს.

"დაუჯერებელია. ბევრი ფიქრობს, "რატომ მას?" და ასე შემდეგ, მაგრამ ეროვნულ ნაკრებში გატარებული 15 წლისა და 20-წლიანი საკლუბო კარიერის შემდეგ ხვდები, რომ დაგაფასეს.

ჩვეულებრივ, ასეთ დამსახურებას სიკვდილის შემდეგ იღებენ, მაგრამ მე ჯერ კიდევ ცოცხალი ვარ. როცა მოვკვდები, ეს ქანდაკება სამუდამო იცოცხლებს", - განაცხადა იბრაჰიმოვიჩმა.

წყარო: goal.com