საფეხბურთო კლუბი "ლოს-ანჯელესი", რომელიც ამერიკის საფეხბურთო ჩემპიონატში შესვლას 2018 წლისთვის გეგმავს, "მანჩესტერ იუნაიტედის" კაპიტნის, უეინ რუნის გადაბირებას ეცდება.

როგორც ცნობილია, MLS-ის ყოველ კლუბს უფლება აქვს, შემადგენლობაში ჰყავდეს მხოლოდ სამი ისეთი ფეხბურთელი, რომელთა ხელფასები ჩემპიონატში დაშვებულ ლიმიტს აღემატება. ასეთ როლზე კი ჩვეულებრივ, ვარსკვლავური იმიჯის მქონე ფეხბურთელებს იწვევენ.

მიუხედავად იმისა, რომ "ლოს-ანჯელესი" მხოლოდ 2018 წლის იანვარში შეძლებს ჩრდილოამერიკულ ლიგაში ასპარეზობას, შემადგენლობის კომპლექტირების პროცესი უკვე დაწყებულია. კალიფორნიულმა ამბიციურმა კლუბმა უკვე დაიწყო სამი ცნობილი ფეხბურთელის ძებნა მომდევნო ზაფხულისთვის, რათა შემდეგ დროებით ისინი იჯარის წესით გაასხვისოს.

The Telegraph-ი იტყობინება, რომ "ლოს-ანჯელესის" ბოსებმა უკვე შეადგინეს 10 ვარსკვლავისგან შემდგარი სია, რომელში შესულ ფეხბურთელებთან მოლაპარაკებას ეცდებიან. რუნის გარდა ამ სიაში ლუკა მოდრიჩი და სესკ ფაბრეგასიც არიან.

გამოცემა ასევე ამტკიცებს, რომ 2014 წლის თებერვალში რუნისა და "იუნაიტედს" შორის გაფორმებული კონტრაქტი არა 5-ნახევარ წელიწადზეა გათვლილი, როგორც ეს ოფიციალურად გამოცხადდა, არამედ 4-ნახევარზე და პლუს 12-თვიან გახანგრძლივების ფუნქტს შეიცავს.

ამგვარად, მიმდინარე სეზონის დასრულების შემდეგ, რუნის მხოლოდ ერთი გარანტირებული წელი დარჩება კონტრაქტში, რომლის მიხედვითაც კვირაში 300 ათას ფუნტს იღებს ხელფასის სახით. ამან კი უეინს წასვლისკენ შეიძლება უბიძგოს, მითუმეტეს, თუკი მას ასეთსავე სარფიან და უფრო გრძელვადიან კონტრაქტს შესთავაზებენ.

"კონკრეტულ სახელებს არ დავასახელებთ, მაგრამ წინასწარი მოლაპარაკებები უკვე გავმართეთ გლობალური მასშტაბის რეპუტაციის მქონე ფეხბურთელთან ჩვენს გუნდში მათი გადმოსვლის სურვილის თაობაზე", - განაცხადა "ლოს-ანჯელესის" პრეზიდენტმა და მფლობელმა ტომ პენიმ.

"ვიცოდი, რომ "ლოს-ანჯელესის" პირველ ლეგენდად ყოფნის შესაძლებლობა მიმზიდველი იქნებოდა, მაგრამ ვერც კი წარმოვიდგენდი იმ ფეხბურთელთა და მწვრთნელთა დონეს, რომლებმაც უკვე გამოავლინეს ინტერესი ჩვენი საოცარი პროექტისადმი", - დაამატა კლუბის აღმასრულებელმა ვიცე-პრეზიდენტმა ჯონ ტორინგტონმა.

წყარო: telegraph