ინგლისის ნაკრების მთავარი მწვრთნელის მოვალეობის დროებითმა შემსრულებელმა გარეთ საუთგეითმა აღნიშნა, რომ უეინ რუნის პოზიციას ეროვნულ ნაკრებში არაფერი ემუქრება.
ამჟამად გარეთი ინგლისის ნაკრების ჩაბარების უმთავრეს კანდიდატად გვესახება, რის გამოც ხალხისთვის მნიშვნელოვანია მისი აზრი კაპიტნის შესახებ.
მიუხედავად იმისა, რომ მსოფლიოს 2018 წლის ჩემპიონატის შესარჩევ მატჩში სლოვენიის ნაკრების წინააღმდეგ რუნი სათადარიგოთა სკამზე მოხვდა, საუთგეითი მისთვის სამკლაურის ჩამორთმევას არ აპირებს. "ის ინგლისის ნაკრების კაპიტანია და მიუხედავად იმისა, რომ სლოვენიასთან სასტარტო შემადგენლობაში არ იყო, მასში კვლავ ვხედავ კოლექტივისთვის უმნიშვნელოვანეს ფიგურას და ეს ყოველთვის ასე იქნება.
ვნახოთ, რა მოხდება, მაგრამ თანამშრომლობის 10 დღის განმავლობაში საუკეთესოდ შევისწავლე მისი ლიდერობის უნარები. ჩემზე უდიდესი შთაბეჭდილება მოახდინა.
დავინახე, როგორ უყურებენ სხვა ფეხბურთელები და რაოდენ დადებითი ეფექტი აქვს გარშემო მყოფებზე. ეს რომ ასე არ იყოს, ამას არც ვიტყოდი. მაგრამ ეს ასეა", - განაცხადა საუთგეითმა.