თავის 31-ე დაბადების დღეზე "მანჩესტერ იუნაიტედის" კაპიტანმა შეიტყო, რომ კლუბის მთავარი მწვრთნელი მას გუნდის გამოცვლას ურჩევს.

ბოლო რამდენიმე თვის განმავლობაში უეინ რუნი მოედანზე თავისთვის საუკეთესო პოზიციის ძიების პროცესშია, მაგრამ ვერც თავდამსხმელად და ვერც ნახევარმცველად ვერ ბრწყინავს. შედეგად, რუნიმ ადგილი დაკარგა კლუბისა და ნაკრების სასტარტო შემადგენლობაში.

შეგახსენებთ, რომ პრემიერ ლიგის ზედიზედ მეოთხე შეხვედრაში რუნი სასტარტო შემადგენლობაში არ გამოჩენილა, "ჩელსისთან" მატჩის განაცხადში კი საერთოდ ვერ მოხვდა ტრავმის გამო. კაპიტნის პერსპექტივები, რომელმაც თავის 31-ე წელს ორშაბათს მიაღწია, "ოლდ ტრაფორდზე" საკმაოდ ბუნდოვანია.

The Sun-ისთვის ცნობილი გახდა, რომ მოურინიო რუნის წარმომადგენლებს დაუკავშირდა და შეატყობინა, რომ მათი კლიენტისთვის სასტარტო შემადგენლობაში მოხვედრის გარანტიის მიცემა არ შეუძლია და რუნის სახით "იუნაიტედის" მომავლის შენებაში წამყვან ფიგურას ვერ ხედავს.

მოურინიომ აღნიშნა, რომ რუნის გაყიდვის აუცილებლობას თავის მხრივ ვერ ხედავს, მაგრამ ფეხბურთელის კეთილდღეობისა და მუდმივი სათამაშო პრაქტიკის გამო მას კლუბის შეცვლას ურჩევს. სავსებით შესაძლებელია, რომ არსებული მდგომარეობის გაუარესების ან შენარჩუნების შემთხვევაში რუნი ამერიკის ან ჩინეთის ჩემპიონატში გადასვლაზე დაფიქრდეს.

ინგლისელის მოქმედი კონტრაქტი "იუნაიტედთან" 2019 წელს იწურება.

წყარო: the sun