ჟოზე მოურინიომ დაადასტურა, რომ "მანჩესტერ იუნაიტედისა" და "ფენერბაჰჩეს" შეხვედრაში კრის სმოლინგი ტრავმის გამო შეცვალა, ჰენრიხ მხითარიანის თაობაზე კი პოზიტიური ახალი ამბავი აქვს.

სმოლინგმა ევროპის ლიგის მატჩი ერიკ ბაიისთან ერთად სასტარტო შემადგენლობაში დაიწყო, მაგრამ შესვენებაზე მარკოს როხომ შეცვალა.

მატჩის შემდეგ მოურინიომ კრისის მდგომარეობის შესახებ განაცხადა: "კუნთი აწუხებდა. 3-0 ვიგებდით, ამიტომ მისი შეცვლა გადავწყვიტეთ. იმედი მაქვს, კვირისთვის მზად იქნება".

მხითარიანი "წითლების" შემადგენლობაში 10 სექტემბრის შემდეგ არ გამოჩენილა, თუმცა ვარჯიშებს უკვე დაუბრუნდა. "ფენერბაჰჩესთან" მატჩში სომეხი ფეხბურთელი გუნდის განაცხადში ვერ მოხვდა და მწვრთნელმა ახსნა, თუ რატომ მიიღო ასეთი გადაწყვეტილება.

"სიმართლე ის არის, რომ მატა, მარსიალი და ლინგარდი ვათამაშეთ. აინშტაინი არ ვარ, ისეთი ტაქტიკური სისტემა ჩემთვის ნაცნობი არ არის, რომელიც ერთდროულად ოთხი ვინგერის დაყენების საშუალებას მოგცემს. მან უფრო მეტი უნდა იშრომოს ინტენსიურობის შესაძენად და უმაღლეს დონეზე სათამაშოდ ფორმაში ჩასადგომად.

მისთვის შემეძლო 15 ან 20 წუთი მიმეცა სათამაშოდ, როგორც ეს მემფისს მივეცი, მაგრამ ვიფიქრე, რომ ჯობდა ისე ეშრომა, როგორც გუშინ და ეს უკეთესიც იქნებოდა.

დღესაც ისევე უნდა იშრომოს, როგორც სპეციფიურად სეზონის განმავლობაში და თავის შანსს დაელოდოს. მაგრამ მზად არის. მალე იქნება მზად", - განაცხადა მოურინიომ.

წყარო: manutd.com