მცველი ტიმოთი ფოსუ-მენსა და ნახევარმცველი ხუან მატა პირველი ფეხბურთელები გახდებიან, რომლებიც ჟოზე მოურინიოს ხელმძღვანელობით "მანჩესტერ იუნაიტედთან" კონტრაქტს გაახანგრძლივებენ.

ფოსუ-მენსას დებიუტი "წითლების" რიგებში თებერვალში შედგა. მას შემდეგ ჰოლანდიელმა მოურინიოზე კარგი შთაბეჭდილება დატოვა და პორტუგალიელმა იგი იჯარითაც კი არ გაანათხოვრა, თუმცა უნდა აღინიშნოს, რომ სათამაშო პრაქტიკას მხოლოდ ლიგის თასსა და ევროპის ლიგაზე აძლევს.

მიუხედავად ამისა, მოურინიოს სჯერა, რომ 18 წლის ტიმოთის დიდი მომავალი ელის და ამის დამტკიცებას მისთვის ახალი კონტრაქტის შეთავაზებით აპირებს, რომლის წყალობითაც ახალგაზრდა ფეხბურთელის ხელფასი კვირაში 25 ათას ფუნტამდე გაიზრდება.

ბრიტანული მედია ასევე იტყობინება, რომ ახალ კონტრატს მიიღებს ხუან მატაც, რომელთანაც მოურინიო ჯერ კიდევ "ჩელსიში" მუშაობდა.

მიმდინარე სეზონის სტარტზე 28 წლის ესპანელი რეგულარულად გამოდის მოედანზე, ხოლო სათადარიგოთა სკამზე უეინ რუნის დასმის შემდეგ მატას კიდევ უფრო მნიშვნელოვანი როლი დაეკისრა.

წყარო: thesun