"ლექსტერ სიტის" მთავარი მწვრთნელი კლაუდიო რანიერი აცხადებს, რომ მოურინიოსა და მისი უთანხმოება წარსულს ჩაბარდა და პორტუგალიელთან ერთად ღვინის დალევისთვისაც მზად არის.
როცა 2004 წელს მოურინიომ "ჩელსის" მთავარი მწვრთნელის პოსტზე რანიერი ჩაანაცვლა, მას უიღბლო უწოდა და დააბრალა, რომ ტიტულის მოგება სულაც არ სურდა. მოგვიანებით კი ჟოზე "ინტერში" მუშაობისას აკრიტიკებდა იტალიელ კოლეგას.
"ოლდ ტრაფორდზე" შაბათს გასამართი მატჩის წინ რანიერი გვარწმუნებს, რომ მოურინიოსა და მის ურთიერთობაში ყველაფერი რიგზეა და მატჩის შემდგომ ღვინოს სიამოვნებით დალევდა.
"დიახ, უთანხმოება გვქონდა, მაგრამ ეს პრეისტორიულ ხანაში იყო. დიდებული, ძალიან კარგი ურთიერთობა გვაქვს, ყოველგვარი პრობლემის გარეშე.
Soccer Aid-ს მიერ ამ ზაფხულს ჩატარებული საქველმოქმედო მატჩი გახსოვთ? დანარჩენი მსოფლიოს ნაკრების მწვრთნელი მე ვიყავი და ჟოზეს ინგლისის ნაკრებს ვხვდებოდი.
ჩვენი უთანხმოება წარსულს ჩაბარდა, ახლა ყველაფერი რიგზეა. ყველა მწვრთნელს თავზესაყრელი საქმე აქვს. ურთიერთობა დალაგდა, ჟოზე კარგი მწვრთნელი და დიდებული ადამიანია.
იქნებ კარგი წითელი ღვინის დალევაც შემომთავაზოს. წითელი ღვინო მიყვარს და თუ შემომთავაზებს, დავთანხმდები", - განაცხადა იტალიელმა სპეციალისტმა.