Sky Sports-ის ექსპერტი რეი პარლორი მიიჩნევს, რომ "მანჩესტერ იუნაიტედის" მთავარმა მწვრთნელმა ჟოზე მოურინიომ სასტარტო შემადგენლობაში უეინ რუნი აღარ უნდა გაამწესოს.

30 წლის რუნიმ მიმდინარე სეზონში "წითელი ეშმაკების" საწყისი ხუთივე შეხვედრა პირველივე წუთებიდან ითამაშა, თუმცა მხოლოდ კრიტიკა დაიმსახურა. გამონაკლისი შემთხვევა არც ლიგის თასის მატჩი იყო, სადაც კაპიტანი "ნორთჰემპტონის" წინააღმდეგ არც ისე დამაჯერებლად გამოიყურებოდა.

პარლორს მიაჩნია, რომ ამჟამად რუნი გუნდისთვის დიდ პრობლემას წარმოადგენს და მოურინიომ იგი უნდა შეცვალოს.

"ვფიქრობ, რუნი ამჟამად დიდ პრობლემას წარმოადგენს. რას მოიმოქმედებს მოურინიო? კვლავ გამოიყენებს?

ისეთი შეგრძნება მაქვს, თითქოს დრო მოვიდა სასტარტო შემადგენლობიდან რუნის ამოგდებისა - უბრალოდ იმისათვის, რომ ხელახლა დაიმუხტოს და ყურადღების ცენტრს განერიდოს, რადგანაც ახლა ის უმძიმესი კრიტიკის ქვეშ ექცევა.

ვფიქრობ, სასტარტოში მაიკლ კერიკი ან მორგან შნეიდერლინი უნდა გამოჩნდნენ, რომლებმაც პარტნიორობა მარუან ფელაინის უნდა გაუწიონ. 10 ნომერის პოზიციაზე პოლ პოგბა ითამაშებდა. ერთ ფლანგზე რეშფორდი, უთუოდ იბრაჰიმოვიჩი და მარჯვენა მხარეს ვაკანტური ადგილი უჩნდებათ.

ახლა მხოლოდ სწორი ბალანსის პოვნაა საჭირო, რასაც მოურინიო ბოლო რამდენიმე მატჩში ვერ ახერხებდა", - განაცხადა პარლორმა.