"მანჩესტერ იუნაიტედის" მთავარი მწვრთნელი ჟოზე მოურინიო აცხადებს, რომ სერხიო აგუეროს გარეშე დარჩენილი "მანჩესტერ სიტი" კიდევ უფრო რთულად დასამარცხებელი მეტოქე იქნება.

დღეს "ოლდ ტრაფორდზე" მანჩესტერული დერბი შედგება, რომელსაც არგენტინელი თავდამსხმელი დისკვალიფიკაციის გამო გამოტოვებს. "ვესტ ჰემის" მცველის, უინსტონ რიდის წინააღმდეგ უხეში თამაშის გამო ინგლისის საფეხბურთო ასოციაციამ აგუერო 3-მატჩიანი დისკვალიფიკაციით დასაჯა.

"იუნაიტედის" პორტუგალიელი მწვრთნელი თვლის, რომ აგუეროს დანაკლისი "სიტის" კიდევ უფრო ამოუცნობ გუნდად აქცევს, რადგანაც მის ნაცვლად პეპ გვარდიოლას არაერთი სხვადასხვა ფეხბურთელის გამოყენება შეუძლია.

"აგუეროს დისკვალიფიკაცია სიტუაციას ცვლის, რადგანაც ასე საქმე გვირთულდება. როცა აგუერო ხელმისაწვდომია, ვიცით, რომ აუცილებლად ითამაშებს, მათ სქემას ვიცნობთ, მათ მოძრაობას ვიცნობთ. არავითარი ეჭვი არ არსებობს, რომ მისი კალიბრის ფეხბურთელი უთუოდ ითამაშებს, როცა ხელმისაწვდომია.

თამაშის არჩევის საოცრად მრავალი ვარიანტი აქვთ. ახლა გვარდიოლას ბევრი გადაწყვეტილების მიღება მოუწევს. შეუძლია ათამაშოს იჰეანაჩო, სტერლინგი, ან დავიდ სილვა "ცრუ ცხრიანის" პოზიციაზე ხაზებს შორის. მას ძალიან ბევრი ვარიანტი აქვს.

ამ მატჩისთვის ნაბიჯ-ნაბიჯ, სიტუაციათა თანმიმდევრობით ვემზადებით, რადგანაც ჩვენს ფეხბურთელებს არაპროგნოზირებადობის დოზას ვუმცირებთ.

ვიცით, რომ ჩვენს ფეხბურთელებს სამუშაოს შესრულება გაუჭირდებათ მოწინააღმდეგის მრავალი სათამაშო ვარიანტის გამო. ვიცი, რომ ურთიერსაწინააღმდეგოდ ჟღერს, მაგრამ აგუეროს არყოფნა სიტუაციას უფრო გვირთულებს", - აცხადებს მოურინიო.

წყარო: bbc