10 სექტემბერი...მანჩესტერი..."ოლდ ტრაფორდი"... პრემიერ ლიგა და საფეხბურთო სამყარო სრულ მზადყოფნაშია. 10 სექტემბერს "ოლდ ტრაფორდი" პეპ გვარდიოლასა და კამპანიას უმასპინძლებს!

დიახ, მანჩესტერული დერბი მოგვიახლოვდა, "იუნაიტედი" და "სიტი" მზად არიან "ურთიერთობის გასარკვევად". მანჩესტერული კლუბების დაპირისპირებაში ახალი ციკლი იწყება, რადგანაც ორივე მათგანმა საფეხბურთო ცხოვრების ახალი ეტაპი დაიწყო, ჟოზე მოურინიოსა და პეპ გვარდიოლას დაპირისპირების მთავარი ასპარეზი ახლა უკვე ინგლისი, მანჩესტერია.

მოურინიო და გვარდიოლა ერთმანეთს 18–ჯერ დაუპირისპირდნენ და პორტუგალიელმა ამ დაპირისპირებებში მხოლოდ 3–ჯერ მოახერხა გამარჯვება, ეს არ არის ის სტატისტიკა, რომლის გახსენებაც ჟოზეს დერბის წინ ესიამოვნებოდა, მაგრამ დღეს ორივე მათგანი სულ სხვა პირობებში უპირისპირდებიან ერთმანეთს, დღეს ისინი სხვა ცხოვრებით ცხოვრობენ.



დერბის ორივე კლუბი მაქსიმალური ქულებით შეხვდება, ორივე გუნდმა 3 მატჩში ქულათა მაქსიმუმის დაგროვება შეძლო, თუმცა რომ არა მარკუს რაშფორდი... რომ არა მარკუს რაშფორდი "იუნაიტედი" დერბის დაკარგული ქულებით შეხვდებოდა, მაგრამ ახალგაზრდა ინგლისელმა ეს არ ისურვა და ჟოზეს ბიჭებს 3 ქულა "ჰალ სიტისთან" დაპირისპირებაში მატჩის ბოლო წუთებზე მოუტანა.



ჩემპიონატი კარგად დაიწყეს "ქალაქელებმაც", გვარდიოლას ხელმძღვანელობის ქვეშ ძალიან კარგად ასპარეზობს რაჰიმ სტერლინგი, რომ აღარაფერი ვთქვათ კუნ აგუეროზე, რომელიც "სიტის" და საერთოდ ლიგის საუკეთესო ან, როგორც თქვენ გნებავთ, ერთ–ერთ საუკეთესო მოთამაშედ რჩება.

მაგრამ საქმე სწორედ ისაა, რომ "ოლდ ტრაფორდზე" გამოსულ მოთამაშეებს შორის ჩვენ ვერ ვიხილავთ არგენტინელს, რადგანაც უინსტონ რიდთან ინციდენტის შემდეგ აგუეროს სამმატჩიანი დისკვალიფიკაცია სწორედ მანჩესტერული დერბიდან ეწყება.

გუნდს დაუბრუნდა ბელგიელი ვინსენ კომპანი, მაგრამ როგორც გვარდიოლამ დაადასტურა, ის კვლავ არ ითამაშებს, მისი სიტყვებით რომ ვთქვათ, არ ითამაშებს, "სანამ სისხლის ტესტის შედეგები არ იქნება საუკეთესო".

დანაკლისებზე საუბარი რომ დავასრულოთ, გეტყვით იმას, რომ "იუნაიტედს" დერბის წინ მარუან ფელაინი დაუბრუნდა, დერბი უნდა ითამაშოს ლუკ შოუმ, ბევრ ვარჯიშსა და მუშაობას გვპირდება, თუმცა დარწმუნებული არაა, რომ მზადყოფნაში იქნება ახალი შენაძენი ჰენრიხ მხითარიანი და ბოლოს ანტონიო ვალენსია, რომელიც მატჩის წინა დღით დაბრუნდება მანჩესტერში და ითამაშებს ის თუ არა, მხოლოდ პორტუგალიელმა იცის.

მნიშვნელოვანი ორთაბრძოლები

ზლატან იბრაჰიმოვიჩი VS ჯონ სტოუნსი

ეს იქნება ახალგაზრდა ინგლისელი მცველის ყველაზე უფრო დიდი გამოცდა, ჯონ სტოუნსის მთავარი სამიზნე შვედი იქნება, რომელმაც ჩემპიონატი არაჩვეულებრივად დაიწყო. ზლატანმა, თუ ჩავთვლით "ლესტერთან" დაპირისპირებას, 4 მატჩში 4 გოლის გატანა მოახერხა. ეს იქნება იბრას პირველი მანჩესტერული დერბი, სტოუნსი და მისი არგენტინელი მეწყვილე, ნიკოლას ოტამენდი შვედს იოლ გასეირნებას ვერ დაპირდებიან, თუმცა პირიქითაც შეგვიძლია ვთქვათ, ვერც ზლატანი გაუიოლებს მათ საქმეს, რადგან ეს მას ძნელად რომ ახასიათებდეს.



სტოუნსი გვარდიოლისეური ტიპური მოთამაშეა, ის თავისუფალია ბურთთან და კარგად შეუძლია როგორც უკან თამაში, ასევე შეტევის წამოწყება თუ პრესინგიდან თავის დაღწევა.

თავის მხრივ, ზლატანი არ არის მხოლოდ საჯარიმოს მოთამაშე, მას უყვარს მისი დატოვება, მოშორებით ბურთის მიღება და პასების განაწილება ფლანგებზე თუ უბრალოდ თავისუფალი სივრცის შექმნა. იბრას ავტორიტეტი, რა თქმა უნდა, დიდ გავლენას იქონიებს, ამასთანავე, მისი ფიზიკური მონაცემები შვედს კიდევ უფრო მეტ უპირატესობას აძლევს.

ფერნანდინიო VS პოლ პოგბა

პეპმა მოსვლის შემდეგ ფერნანდინიოს ზუსტად შეურჩია იდეალური პოზიცია, თამაშობს რა და უფრო მეტ დაცვით ფუნქციებს ასრულებს, ბრაზილიელის ცენტრში ყოფნამ ნახევარდაცვა უფრო საიმედო და შედეგიანი გახადა.

გავიხსენოთ თუ როგორ უყვარდა გვარდიოლას "ბარსელონაში" ხავიერ მასკერანო, სწორედ მასთან გარკვეულ თვისებათა მსგავსების გამო აირჩია პეპმა ფერნანდინიო, ის კარგად გრძნობს პოზიციას და აქვს კარგი პასი, აღსანიშნავია მისი კავშირი ზემოთხსენებულ სტოუნსთან, ინგლისელი კარგად ეხმარება მას შეტევების წამოწყებაში.



"იუნაიტედის" მხარეს კი ცენტრში არც მეტი არც ნაკლები "მსოფლიო რეკორდი" პოლ პოგბა იქნება. მხოლოდ დრო გასცემს პასუხს მის სატრანსფერო ღირებულებას, მაგრამ პოგბამ უნდა შეძლოს და მოიპოვოს უპირატესობა ცენტრში ისეთი თვისებებისდა დახმარებით, როგორიცაა მისი ფიზიკურობა, სიმაღლე და სისწრაფე. პოგბას დრიბლინგს, გარღვევებსა და პასებს შეუფასებელი მნიშვნელობა ექნება.

ერიკ ბაიი VS კელეჩი იჰეანაჩო

ერიკ ბაიის მანჩესტერული კარიერა უბრალოდ შეუდარებლად დაიწყო. ფეხბურთელი, რომელსაც ბევრი სკეპტიკურად უყურებდა და, ამასთან, არავინ იცნობდა, დღეს "იუნაიტედის" გულშემატკივრების ერთ–ერთი საყვარელი ფეხბურთელია. დეილი ბლინდთან მისი პარტნიორობა განვლილი თამაშების ფონზე აღსანიშნავი და გამოსაყოფია, რადგანაც ეს ბოლო ორი დაცვაში შესანიშნავად ასპარეზობენ.

მანჩესტერული დერბი, რაღა თქმა უნდა, გამოცდა იქნება დაცვის ამ წყვილისთვის, "იუნაიტედის" უამრავი გულშემატკივარი ელოდა ერიკისა და აგუეროს დაპირისპირებას, რამეთუ ეს იქნებოდა ნამდვილი გამოცდა და საზომი, თუმცა უკვე აღვნიშნეთ, რომ აგუერო არ ითამაშებს და ამჯერად ბაიის "მორიგი მსხვერპლი" კელეჩი იჰეანაჩო უნდა გამოდგეს, მაგრამ რამდენად რეალურია ეს?



იჰეანაჩო გასული სეზონის ერთ–ერთი აღმოჩენაა, როგორც გვარდიოლამ მოიხსენია, ის თავდამსხმელადაა დაბადებული. მართლაც, მას არ ჰქონია ბევრი სათამაშო დრო, თუმცა მისი ეს დრო ნამდვილად იყო ნაყოფიერი.

"იუნაიტედთან" ის, სავარაუდოდ, ძირითადში დაიწყებს და შეეძლება იმ მომენტების რეალიზებას, რომელსაც მას სილვა, ნოლიტო, დე ბრუინე თუ სტერლინგი შეუქმნიან, მაგრამ ის ხომ ლიგის საუკეთესო დაცვას დაუპირისპირდება("იუნაიტედს" მხოლოდ ერთი გოლი აქვს გაშვებული)? რა არის ნიგერიელის უპირატესობა? ის ტექნიკური, სწრაფი მოთამაშეა, მაგრამ ყველაზე უფრო კარგად მას პოზიციების შერჩევა გამოსდის. ბაიის მთავარი საზრუნავი სწორედ ეს იქნება, სხვა მხრივ სისწრაფესა და ფიზიკურ ბრძოლაში მას ნიგერიელთან არანაირი პრობლემები არ უნდა ჰქონდეს, ამიტომ ზემოთ დასმულ შეკითხვაზე, თუ რამდენად რეალური არის შანსი იმისა რომ იჰეანაჩო ერიკის "მორიგ მსხვერპლად" მოგვევლინოს, პასუხი მეტად დადებითია, ვიდრე უარყოფითი.

ყველაფერი ეს მხოლოდ ვარაუდია, ვარაუდი, რომელიც გარკვეულ ფაქტებზეა დაყრდნობილი, გვარდიოლას მოურინიოსთან კარგი სტატისტიკა აქვს, თუმცა ყველამ ვიცით, რომ პორტუგალიელი ესპანელის ყველაზე არასასურველი მეტოქეა, ამჯერად "სახლში" მოურინიოა და არა გვარდიოლა.

კარგი თამაში, გამორჩეული მომენტები, დაძაბულობა, ყველაფერ ამას ელოდება გულშემატკივარი ამ დაპირისპირებისგან, ჩვენი მხრივ კი დავამატებთ ერთ სუბიექტურ მოსაზრებას – "იუნაიტედის" გამარჯვებას, დიახ ,ჩვენ გამარჯვება და 3 ქულა გვსურს, თუმცა ეს მხოლოდ და მხოლოდ მე–4 ტურია და ჩემპიონატის დასრულებამდე ჯერ ძალზედ რთული და გრძელი გზაა გასავლელი.

პროგნოზი

"მანჩესტერ იუნაიტედი" – "მანჩესტერ სიტი" 2–1

Bleacher Report