"მანჩესტერ იუნაიტედისა" და მსოფლიო ფეხბურთის ლეგენდარულმა ნახევარმცველმა, პოლ სქოულზმა განაცხადა, რომ მოურინიო "იუნაიტედში" ზუსტად იმას აკეთებს, რაც აქამდე უნდა გაეკეთებინათ მის წინ მყოფ მწვრთნელებს - კლუბში მოეყვანათ ისეთი ფეხბურთელები, რომლებიც თავიდანვე მოახდენდნენ გავლენას გუნდზე.

"მოთამაშეები, რომლებიც ჟოზემ გუნდში მოიყვანა, გვაჩვენებს განსხვავებას მასსა და მის წინამორბედ მწვრთნელებს შორის - აცხადებს პოლი Sky Sports News-ის ეთერში. - დევიდ მოიესმა და ლუი ვან გაალმა გარისკეს, როდესაც ფეხბურთელები შეიძინეს, რადგან ისინი ისეთები იყვნენ, რომ შეიძლებოდა მათი კარიერა "იუნაიტედში" კარგად ან ცუდად წარმართულიყო, მაგრამ მოურინიომ კლუბში მოიყვანა უკვე მზა ფეხბურთელები. სწორედ ეს იყო აუცილებელი - მას სჭირდებოდა მოთამაშეები, რომლებიც ახლავე ითამაშებდნენ პრემიერ ლიგაში. ჟოზემ იცოდა, რომ შესაფერისი დრო არ იყო, გაერისკა."

"ის, რომ გუნდში იბრაა - კარგი სიახლეა ახალგაზრდა ფეხბურთელებისთვის, განსაკუთრებით კი- რეშფორდისთვის. მარკუსისთვის ძალიან მნიშვნელოვანი სეზონია წელს, რადგან მას ექნება შესაძლებლობა ისწავლოს ზლატანისგან ფეხბურთის სწორად თამაში, რაც მისი მომავლისთვის ძალიან სასარგებლოა. "იუნაიტედში" ყოველთვის იყვნენ ისეთი მოთამაშეები, როგორიც ზლატანია, სწორედ მათი ქარიზმის დამსახურებით გულშემატკივარი კლუბისგან ყოველთვის გამარჯვებას ელოდა."

"იბრაჰიმოვიჩმა ყველა ჩემპიონატი მოიგო, სადაც ითამაშა. ბოლო სამი სეზონის განმავლობაში პოგბას ერთი ნაბიჯი აკლდა ჩემპიონთა ლიგის მოსაგებად, ხოლო შიდა ჩემპიონატი ყველა სეზონში მოიგო. ეს მოთამაშეები შეეჩვივნენ გამარჯვებას, მათში გამარჯვებულის მენტალიტეტი ძალიან დიდია, სწორედ ეს ამცირებს ყველანაირ რისკს. როგორც გითხარით, მოურინიოს გარისკვის დრო არ აქვს."

"სეზონი ყველამ კარგად დაიწყო, გუნდს თვითდაჯერებულობა მოემატა. ისეთი ფეხბურთელების შეძენით, როგორიც "იუნაიტედმა" შეიძინა, გუნდს გამარჯვებულის იმპულსი უყალიბდება. ეს ყველაფერზე მოქმედებს - განწყობაზე გასახდელ ოთახში, გუნდურ თამაშზე და ვფიქრობ, რომ მოთამაშეები ამას მატჩებშიც ამტკიცებენ."

წყარო: manutd.ru