ჟოზე მოურინიო წინასამატჩო პრესკონფერენციაზე კლოპისა და ვენგერის განცხადებებს გამოეხმაურა (საუბარია პოლ პოგბას ტრანსფერზე, ვენგერმა განაცხადა რომ ფრანგის ამ ფასად შეძენა სრული სიგიჟეა, კლოპმა კი საერთოდ არ გამოთქვა სურვილი ამ ფასის ფეხბურთელთან მუშაობისა) და ისინი უეთიკობაში დაადანაშაულა, ამასთან პორტუგალიელმა დაადასტურა რომ პოგბას ტრანსფერი სულ მალე დასრულდება.

"როგორც გავიგე ჩემი ორი კოლეგა უკვე საუბრობს ჩემს გუნდზე, მე კი ეს ძალზედ არ მომწონს, ეთიკის ნაკლებობასთან გვაქვს საქმე. მე რომ ასეთი განცხადებები გამეკეთებინა მაშინვე აღმოვჩნდებოდი ყურადღების ცენტრში, მაგრამ როცა ამას სხვა აკეთებს, არავინ არაფერს ამბობს. არ ვისაუბრებ სხვების შესახებ, აკეთონ ის რაც სურთ"

"სატრანსფერო ბაზარზე კარგი სამუშაო ჩავატარეთ, ჩვენ არ გვინდოდა 10 ფეხბურთელის შეძენა, გვსურდა 4 ფეხბურთელის დამატება, ისინი ვინც შეეფერება ჩვენს დონეს და მართლაც გაგვაძლიერებს. ბაიი რომელიც ახალგაზრდა და ამასთან უდიდესი პოტენციალის მქონე ფეხბურთელია, მხითარიანი რომელიც ბევრ საგოლე მომენტს შექმნის, მის შესაძლებლობებში ეჭვი არავის ეპარება, სუპერ თავდამსხმელი ზლატანის სახით და ნახევარმცველი, კარგი ნახევარმცველი რომლის დამატებასაც ვაპირებთ. გუნდში იქმნება ბალანსი და მე ბედნიერი ვარ იმ შემადგენლობით, რაც ჩემს ხელთაა"

კითხვაზე უნდა ელოდნონ თუ არა "იუნაიტედის" გულშემატკივრები "დიდ შენაძენს" მოურინიომ მიუგო:

"დიახ. 22 ფეხბურთელი გვყავს და ახალ სეზონს 23–ით შევხვდებით. მე არ მიყვარს და არ ვაპირებ სხვა გუნდებსა თუ სხვა გუნდის ფეხბურთელებზე ვისაუბრო, ეს სხვისი საქმეა, ეს სხვას უყვარს, მე არა"

"ჩემთვის მთავარია ვიცოდე თუ რა ხდება ჩემს სახლში, მე არ ვარ დაინტერესებული მეზობლებით. პოგბა "იუვენტუსის" ფეხბურთელია, სანამ ოფიციალურად არ დადასტურდება ტრანსფერი, მე ვერაფერს გეტყვით მის შესახებ. დიახ, სატრანსფერო ფანჯარა 31 აგვისტოს იხურება, მაგრამ დარწმუნებული ვარ და ვიცი რომ ჩემი გუნდი სატრანსფერო საქმიანობას 14 აგვისტომდე დაასრულებს. იდეაში შემდეგ კვირაში ჩვენ ყველაფერი დასრულებული გვექნება"

ჟოზემ ისაუბრა იმაზეც, რომ ევროპა ლიგის გამო მან ფეხბურთელთა რაოდენობა 20–დან 23–მდე გაზარდა, ამასთან კომენტარი გააკეთა შვაინშტაიგერის შესახებაც, რომლის კარიერა როგორც ჩანს "იუნაიტედში" დასასრულს მიუახლოვდა:

"რა ხდება ? რატომ ამხელა აჟიოტაჟი ? ეს ხომ მსოფლიოს ნებისმიერ გუნდში ხდება ? მწვრთნელი თვითონვე ირჩევს იმ ფეხბურთელებს, რომელთაც საჭიროდ ჩათვლის. 15 წლის განმავლობაში 20 ფეხბურთელთან ერთად ვმუშაობდი, ახლა კი გადავწყვიტე ეს რიცხვი 23–მდე გამეზარდა, პლუს 3 მეკარე. ჩვენ ბევრი თამაშის ჩატარება მოგვიწევს, განსაკუთრებით ეს ევროპა ლიგას ეხება, ამიტომ გრძელი გზის გასავლელად ჩვენ მზად უნდა ვიყოთ"

წყარო:The Guardian