მიუხედავად იმისა, რომ ჟოზე მოურინიომ აღნიშნა, ჩემი გუნდი ყველაზე ცუდ მდგომარეობაში იმყოფებაო, პორტუგალიელი სპეციალისტი პრემიერ ლიგის ტიტულისთვის ბრძოლაზე უარს არ ამბობს.
"წითელი ეშმაკები" მომდევნო სეზონში ევროპის ლიგაზე იასპარეზებენ და ამის პარალელურად ჩემპიონთა ლიგაზე დაბრუნებას დაისახავენ მიზნად, თუმცა მოურინიო მეოთხე ადგილს არ დასჯერდება და უფრო დიდ მიზანს ისახავს. "მფლობელებისა და მისტერ ვუდვორდის შეტყობინება ასეთი იყო: "გამოიყენე შენი სამი წელი, აკეთე შენი საქმე, გააუმჯობესე გუნდი და ამ სამ წელიწადში კუთვნილ ადგილას დაგვაბრუნე". ჩემი პასუხი კი ის იყო, რომ ვუთხარი, მომდევნო სეზონში ტიტულისთვის ვიბრძოლებ-მეთქი.
მე ჩემპიონობა მინდა. სეზონის დაწყებამდე ვთქვა, რომ ოთხეულია ჩემი მიზანი? ოთხეული არ არის მიზანი. ჩვენ იმისათვის ვითამაშებთ, რომ გავჩემპიონდეთ.
თუ სეზონის მიმდინარეობისას გავაცნობიერებთ, რომ ქულათა სხვაობა ტიტულისთვის ბრძოლის საშუალებას არ იძლევა, ახალ მიზანს დავისახავთ და თუ ჩემპიონობა აღარ შეგვეძლება, მაშინ ოთხეული იქნება მიზანი", - განაცხადა "იუნაიტედის" მთავარმა მწვრთნელმა.