SunSport-მა პოლ პოგბას ტრანსფერის თაობაზე, რამდენიმე საათის წინ, სენსაციური ინფორმაცია გამოაქვეყნა. ბრიტანული გამოცემის ცნობით, ჟოზე მოურინიო 105 მილიონი ფუნტის სანაცვლოდ, პოგბას ტრანსფერს ამ კვირას დაასრულებს.

ჯერჯერობით პოლის ტრანსფერის თაობაზე მოლაპარაკებები, მინო რაიოლასა და "იუვენტუსს" შორის მიმდინარეობს. დიდად სავარაუდოა, რომ გარიგება კვირის ბოლოს დასრულდება.

23 წლის ფრანგი ვარსკვლავი ამჟამად ამერიკაში, არდადეგებზე იმყოფება. შეერთებული შტატებიდან დაბრუნების შემდეგ, პოგბა "მანჩესტერ იუნაიტედთან" 5 წლიან კონტრაქტს გააფორმებს. მისი ანაზღაურება კი კვირაში 220 ათასი ფუნტი იქნება.

რაიოლა "იუნაიტედის" ბოსებთან საფრანგეთის ნაკრებისა და "იუვენტუსის" ნახევარმცველის თაობაზე, უკანასკნელი რამდენიმე დღის განმავლობაში მოლაპარაკებებს აქტიურად აწარმოებს, ტრანსფერისთვის, რომელიც ძალიან მალე მადრიდის "რეალის" მიერ გარეთ ბეილში გადახდილ თანხას (86 მილიონ ფუნტს) დაჩრდილავს.

პოგბა დიდი ალბათობით, მანჩესტერში, სამედიცინო შემოწმების გასავლელად, სამშაბათს ჩავა.

წყარო: The Sun