"მანჩესტერ იუნაიტედის" ყოფილი მწვრთნელი სერ ალექს ფერგიუსონი ფიქრობს, რომ ჟოზე მოურინიო სწორად მოიქცა, როცა რაიან გიგზს თავისი ასისტენტის პოსტი არ შესთავაზა.

გასულ კვირას "წითელმა ეშმაკებმა" ოფიციალურად დაადასტურეს, რომ გიგზმა კლუბი 29-წლიანი კავშირის შემდეგ დატოვა. თავისი წასვლა კი უელსელმა იმით ახსნა, რომ დამოუკიდებელი სამწვრთნელო კარიერის დაწყება სურს.

სერ ალექსი მოურინიოსა და გიგზის ამ გადაწყვეტილებას მხარს უჭერს და მიაჩნია, რომ უელსელისგან კარგი მწვრთნელი დადგება.

"შენი ასისტენტის სახით უნდა გყავდეს ადამიანი, ვისაც მთელ შენს სიცოცხლეს ანდობ. როცა "იუნაიტედში" მივედი, თან წავიყვანე არჩი ნოქსი, რადგან ჩემთვის ფასდაუდებელი ფიგურა იყო. 100%-ით ვენდობოდი.

ჟოზე მოურინიოს უკვე ჰყავს თავისი ასისტენტი და აბსოლუტურად სწორია, რომ მისი ერთგული დარჩა. ასისტენტი რომ არ ჰყოლოდა, ვიცი, რაიანს აიყვანდა.

დროა, გიგზი ფეხზე დადგეს, სივრცეში გავიდეს და ახალი გამოწვევა მიიღოს. შინაგანად ამისთვის ძლიერია.

ახლა ფეხბურთი - ეს ძალიან დაძაბული ინდუსტრიაა, სადაც შედეგის ჩვენება აუცილებელია და ხალხი, ვინც აქ მუშაობს, მტკიცე ხასიათს ფლობს", - განაცხადა შოტლანდიელმა.

წყარო: BBC.