ჟოზე მოურინიო მეკარეთა მწვრთნელ სილვინო ლოუროსთან ერთად კარინგტონზე მივიდა, რათა "მანჩესტერ იუნაიტედის" მთავარი მწვრთნელის რანგში თავისი პირველი სამუშაო დღე გაატაროს.

მოურინიო მანჩესტერში ორშაბათს დილით ჩავიდა და სასტუმრო "ლოურიში" გაჩერდა, საიდანაც თბილისის დროით 10:50 სთ-ზე კარინგტონისკენ აიღო გეზი.

ლოურო, რომელიც მას ამ დროს თან ახლდა, მოურინიოს მეკარეთა მწვრთნელი იყო "ინტერში", "რეალსა" და "ჩელსიში", და როგორც მოსალოდნელია, "იუნაიტედის" სამწვრთნელო შტაბში იგი ფრანს ჰუკს შეცვლის.

პორტუგალიელის ნდობით აღჭურვილი ასისტენტი რუი ფარია არ შეუნიშნავთ, თუმცა ეს უკანასკნელი მოურინიოს კარინგტონზე ჯერ კიდევ მაისში ახლდა.



"მანჩესტერ სიტის" ახალი მთავარი მწვრთნელი პეპ გვარდიოლაც იმავე სასტუმროში იმყოფებოდა და მიუხედავად იმისა, რომ სოლფორდში მისი ბინა ჯერ მზად არ არის საცხოვრებლად, ნათელია, რომ მოურინიო და გვარდიოლა ერთსა და იმავე სასტუმროში არ იცხოვრებენ.

წყარო: M.E.N.