ლეგენდარულმა უელსელმა კლუბში 29 წელი, ფეხბურთელობასთან ერთად მან ბოლო წლები დევიდ მოიესისა და ლუი ვან გაალის სამწვრთნელო შტაბში გაატარა. მოურინიოს მოსვლის შემდეგ ყველასთვის ცნობილი გახდა, რომ პორტუგალიელის თანაშემწე რუი ფურია გახდება, გიგზს კი საშუალება ეძლევა სამწვრთნელო კარიერა უკვე სხვა კლუბში გააგრძელოს.
ეს იქნება ემოციური დამშვიდობება ლეგენდასთან, რომელმაც "იუნაიტედს" დაუვიწყარი წლები აჩუქა. ის ტოვებს კლუბს, მაგრამ მან იცის რომ წარმატების შემთხვევაში ის აუცილებლად დაბრუნდება.
მას აუცილებლად ექნება შემოთავაზებები. გასულ სეზონში რაიანს ჰქონდა შანსი "სუონსის" ჩაბარებისა, მაგრამ ის ვან გაალის მომავალს დაელოდა. კლუბის ხელმძღვანელობა კი გიგზის კანდიდატურას სერიოზულად ჯერჯერობით არ განიხილავს, ჯერ მოიესი, შემდეგ ვან გაალი და ახლა მოურინიო, ყველაფრის მიზეზი კი ალბათ გამოუცდელობაა.
მოურინიოს მოსვლამ მანჩესტერის ბევრი გულშემატკივარი გაახარა, მაგრამ ალბათ ბევრიც გაანაწყენა რადგან ყველასთვის ნათელი ხდებოდა რომ გიგზის დრო "იუნაიტედში" დასასრულს მიუახლოვდა. ფერგიუსონს ის 14 წლის ასაკში შეუერთდა, სადებიუტო მატჩი 1991/92 სეზონში ჩაატარა და გახდა ყველაზე ტიტულოვანი ბრიტანელი ფეხბურთელი, ამასთან 963 მატჩი ითამაშა "იუნაიტედის" რიგებში.
გიგზის ანგარიშზე პრემიერ ლიგის 13 ტიტულია, რეკორდი, რომელსაც ალბათ ვერავინ გააუმჯობესებს. ამასთან 2 ჩემპიონთა ლიგის ტიტული, 4 ინგლისის თასი და 4 ინგლისის ლიგის თასი.
კარიერის საუკეთესო მომენტები
2 მარტი,1992 წელი – დებიუტი
17 წლის გიგზს ფერგიუსონის მოხიბლვა არ გასჭირვებია, პირველი მატჩი "ევერტონთან" , პირველი გოლი კი "მანჩესტერ სიტის" კარში.
15 მაისი,1992 წელი – საუკეთესო "წიწილა"
გიგზი "კლას 92" – ის ბიჭებთან ერთად ახალგაზრდული ინგლისის თასის გამარჯვებულია, რაც მხოლოდ დასაწყისია უდიდესი წარმატებების. იმ სეზონში გიგზი საუკეთესო ახალგაზრდა მოთამაშედაც დასახელდა.
19 სექტემბერი,1992 წელი – ულამაზესი გოლი "ტოტენჰემის" კარში
3 მაისი,1993 წელი – პირველი მრავალთაგან
"იუნაიტედი" პრემიერ ლიგის სადებიუტო სეზონის გამარჯვებულია, გიგზი კი კლუბის უკვე ერთ–ერთი მნიშვნელოვანი ფეხბურთელია, მომდევნო სამ წელში მანჩესტერთან ერთად მან ორჯერ შეასრულა "ოქროს დუბლი".
14 აპრილი,1999 წელი – საუკუნის გაქცევა
ინგლისის თასის დამატებითი დრო მიმდინარეობდა "არსენალსა" და "იუნაიტედს" შორის, ფერგიუსონის ოცნებები ტრებლზე გაქრობის ზღვარზე იყო, მაგრამ გიგზმა კლუბის ისტორიაში ერთ–ერთი უმნიშვნელოვანესი გოლი გაიტანა, ეს გოლი ისევე დიდხანს ემახსოვრებათ, როგორც მისი თმიანი მკერდი.
26 მაისი,1999 წელი – ჩემპიონთა ლიგის გმირი (1)
გიგზი "იუნაიტედს" ჯერ ფინალის საგზურს ჩუქნის "იუვენტუსის" კარში გატანილი გოლით, შემდგომში კი შერინგემისთვის გაკეთებული პასით "იუნაიტედს" ტიტულის მოპოვებაში ეხმარება.
21 მაისი,2008 წელი – ჩემპიონთა ლიგის გმირი (2)
მოსკოვი... "ჩელსი"... ფინალი... გიგზი ბობი ჩარლტონის რეკორდს ხსნის კლუბში ჩატარებული მატჩების მიხედვით... გიგზს გადამწყვეტი პენალტი გააქვს... გიგზი და "იუნაიტედი" კვლავ საუკეთესონი არიან ევროპაში.
26 აპრილი,2009 წელი – წლის მოთამაშე
18 წლის შემდეგ გიგზი პირველად დასახელდა წლის მოთამაშედ, ცოტა ხნის შემდეგ კი BBC მას წლის სპორტსმენად ასახელებს.
4 ივლისი,2013 წელი – ახალი როლი
39 წლის ასაკში გიგზი მოთამაშე–მწრვთნელად ინიშნება მას შემდეგ, რაც სერ ალექს ფერგიუსონი დევიდ მოიესმა შეცვალა. ეს სეზონი კლუბის ისტორიაში ყველაზე დიდი იმედგაცრუება იყო, მაგრამ გიგზმა პირველი ნაბიჯი გადადგა მომავალი საწვრთნელო კარიერისთვის.
22 აპრილი,2014 წელი – "მანჩესტერ იუნაიტედის" მთავარი მწვრთნელი
საფეხბურთო კარიერა არ ჰქონდა დასრულებული, თუმცა მთავარი მწვრთნელის პოსტზე დაინიშნა მოიესის გათავისუფლების შემდეგ. მისი ხელმძღვანელობით კლუბმა 2 მატჩი მოიგო, 1 ფრედ ითამაშა და 1 წააგო. სეზონის ბოლოს კი მან კარიერა დაასრულა, დაასრულა როგორც ლეგენდამ, რომელმაც წარუშლელი კვალი დატოვა "მანჩესტერ იუნაიტედის" ისტორიაში.
ივლისი,2016 წელი - დამშვიდობება
კი... ის მიდის... რაიან გიგზი "მანჩესტერ იუნაიტედს" ტოვებს ! გვტოვებს ჩვენც, მათ ვისაც ყველაზე უფრო მეტად გვიყვარს ის, მაგრამ გვტოვებს იმ იმედით, რომ ის დაბრუნდება, დაბრუნდება და იქნება ისევე წარმატებული, როგორიც ფეხბურთელობის დროს, დაბრუნდება და "იუნაიტედს" კვლავ მოუტანს უდიდეს წარმატებებს ! გიგზი ხომ "მანჩესტერ იუნაიტედია" ?!