ზლატან იბრაჰიმოვიჩი "მანჩესტერ იუნაიტედში" თავის ტრანსფერს 1 ივლისს, პარასკევს გააფორმებს.

34 წლის თავდამსხმელს, რომელიც ჯერ კიდევ ითვლება "პარი სენ-ჟერმენის" ფეხბურთელად, მოქმედი კონტრაქტი პარიზულ კლუბთან დღეს ეწურება.

Dailymail-ი იტყობინება, რომ კონტრაქტის ვადის ამოწურვამდე თუ არ გააფორმებს იბრაჰიმოვიჩი ახალ ხელშეკრულებას სხვა კლუბთან, ლოიალურ ანაზღაურებას მიიღებს ბონუსების სახით.

ხოლო, როცა ეს მოხდება, შვედი "ოლდ ტრაფორდის" მკვიდრ კლუბთან ერთწლიან კონტრაქტს მოაწერს ხელს.

იბრაჰიმოვიჩი ჟოზე მოურინიოს მეორე შენაძენი იქნება "იუნაიტედში" ერიკ ბაიის შემდეგ.

პორტუგალიელს კიდევ ორი ფეხბურთელის გადაბირება სურს, რომელთაგან ერთ-ერთი ჰენრიხ მხითარიანია. "წითლები" 27 წლის გამთამაშებლისთვის 26 მლნ. ფუნტს იხდიან.

მეორე სამიზნედ ფრანგი ნახევარმცველი პოლ პოგბა მოიაზრება, თუმცა "იუნაიტედს" მისი შეძენა გაუჭირდება.

იბრაჰიმოვიჩს ჯერ არასდროს უთამაშია პრემიერ ლიგაში, თუმცა ის არის ჰოლანდიის, ესპანეთის, იტალიისა და საფრანგეთის ჩემპიონი.

შეთანხმება პარასკევს იქნება მიღწეული, მაგრამ მისი ოფიციალურად დადასტურება მხოლოდ მომდევნო კვირაში მოხდება.

წყარო: dailymail