"მანჩესტერ იუნაიტედის" მთავარი მწვრთნელი ლუი ვან გაალი პრემიერ ლიგის სეზონის ბოლო მატჩში "ბორნმუთთან" მოგების შემდეგ Sky Sports-ის ჟურნალისტებს გაესაუბრა და მნიშვნელოვან თემებს შეეხო.

იდეალური გზავნილი ინგლისის თასის ფინალისთვის

"ვერასდროს მიხვდები, მაგრამ ეს ძალიან კარგი გამარჯვებაა. ბევრი, ბევრი შანსი შევქმენით მეორე ტაიმში. პირველში ვერა, როცა ზედმეტად ნელა ვთამაშობდით. თუმცა ეს დაცვითი მოწინააღმდეგის ბრალიც არის. მეორე ტაიმში ძალიან კარგად ვითამაშეთ და ჩემი იმედგაცრუება მხოლოდ ბოლო გოლია, რადგანაც დავიდი ოქროს ხელთათმანის გამარჯვებული უნდა გამხდარიყო. ვფიქრობ, ეს დაიმსახურა. სამწუხაროა, რადგან არასაჭირო გოლი გავუშვით".

დიდებული გოლები

"პირველ ტაიმში ნელა ვთამაშობდით. ეს შესვენებისას ვთქვი. მეორე ტაიმში სივრცეები ვიპოვეთ. ვინგერები უფრო ფართოდ მოქმედებდნენ, ამიტომაც მოედანი გაიზარდა. მოწინააღმდეგეს ამ სივრცეების დაცვა უჭირს და ამით ვისარგებლეთ. ბრწყინვალე გოლები გავიტანეთ, ჩემი აზრით. არც მატაზე დასანიშნი პენალტი უნდა დაგვავიწყდეს, რადგან ესეც შესანიშნავი შეტევა იყო. ვფიქრობ, მეორე ტაიმი ძალიან კარგი იყო".

რატომ უნდა მოხვდეს რეშფორდი ინგლისის ნაკრებში

"მან გაიტანა. თავდამსხმელი, რომელსაც გოლი გააქვს, ყოველთვის კარგია".

საკმარისი გოლები ვერ გავიტანეთ

"მეტ-ნაკლებად ეს არის მთავარი. მაგრამ, ვფიქრობ, მთავარი არის ტრავმების რაოდენობაც, რომელიც ნოემბერსა და დეკემბერში გვქონდა. და თან ეს ტრავმები ორ პოზიციას, ფლანგის მცველებს ეხებოდა. იმ დროს ძალიან დიდი სირთულე იყო".

კრეატიული, სწრაფი შემტევების საჭიროება

"ამ სეზონის წინაც ვთქვი, რომ კრეატიული, სწრაფი შემტევები გვჭირდებოდა. ეს უკვე ვთქვი. ამაზე უნდა ვიზრუნოთ. მიუხედავად ამისა, როცა ყველა ჯანმრთელი იყო, ჩემპიონატში პირველი ადგილი გვეკავა. ეს ფაქტია".

გულშემატკივართა იმედგაცრუების გაგება

"რა თქმა უნდა, ესეც ვთქვი, რადგანაც მათ მაღალი მოლოდინი აქვთ. ჩვენ გარდაქმნის პროცესში მყოფი გუნდი გვყავს. ეს მაშინ ვთქვი, როცა "მანჩესტერ იუნაიტედში" მოვედი. თუმცა, იქნებ უფრო ცხადად უნდა ვისაუბრო, ვიდრე აქამდე."

წყარო: manutd.com