დადასტურდა, რომ საეჭვო ნივთი, რომელიც "ოლდ ტრაფორდზე" აღმოაჩინეს და რომელსაც ბომბის გაუნებელყოფის სამსახურის ჩარევა დასჭირდა, მხოლოდ საწვრთნელ ბომბს წარმოადგენდა.

კვირას გასამართი შეხვედრის წინ "მანჩესტერ იუნაიტედის" პერსონალმა პოლიციას აცნობა, რომ North West Quadrant-ის ტუალეტებში, სერ ალექს ფერგიუსონის სახელობისა და სტრეტფორდ ენდის ტრიბუნებს შორის საეჭვო ნივთი იქნა აღმოჩენილი.

პოლიციამ მაშინვე ბომბის გაუნებელყოფის სამსახური გამოიძახა, თუმცა მოგვიანებით აღმოჩნდა, რომ საგანი რეალურ ასაფეთქებელ მოწყობილობასთან მიმსგავსებული საწვრთნელი ბომბი იყო.

მაშინვე დაიწყო სტადიონის ევაკუირება, ხოლო პოლიციისა და "მანჩესტერ იუნაიტედის" ოფიციალური პირების შეთანხმებით შეხვედრა გადაიდო.

დიდი მანჩესტერის პოლიციის კონსტებლის მთავარი ასისტენტი ჯონ ო'ჰეირი ამბობს: "მადლიერი ვარ "მანჩესტერ იუნაიტედისა" და "ბორნმუთის" გულშემატკივრებისა მათი მხარდაჭერისა და გაგების გამო.

დღევანდელი მოწყობილობის აღმოჩენის შემდეგ დავადგინეთ, რომ ნივთი მხოლოდ საწვრთნელ ვარიანტს წარმოადგენდა, რომელიც კერძო კომპანიას დარჩა ასაფეთქებელი მოწყობილობის მაძებარი ძაღლების წვრთნის შემდეგ.

მიუხედავად იმისა, რომ ეს ნივთი არ არის ნამდვილი ასაფეთქებელი მოწყობილობა, შესახედავად ძალიან ჰგავდა მას და სტადიონის ევაკუირების გადაწყვეტილება სავსებით მართებული იყო, რადგანაც უნდა დავრწმუნდეთ, რომ ხალხი საფრთხეში არ არის.

ყველანი სიმშვიდეს ინარჩუნებდნენ, ინსტრუქციებს მიჰყვებოდნენ, ოფიცრებსა და სტიუარდებთან ერთად მუშაობდნენ და უსაფრთხო ევაკუაცია მალე დასრულდა. ამის გამო საფეხბურთო ოჯახი შექებას იმსახურებს და მათი ქმედებები აღიარებული იქნება.

ასევე მინდა მადლობა გადავუხადო ოპერაციაში მონაწილეობის მიმღებ პირებს ასეთი პროფესიონალური პასუხისმგებლობის გამოვლენისათვის, მათ შორის კი იყვნენ პოლიციის ოფიცრები, სტიუარდები, საფეხბურთო კლუბ "მანჩესტერ იუნაიტედის" პერსონალი, მედიის წარმომადგენლები, კომენტატორები და ბომბის გაუნებელყოფის გუნდი".

"მანჩესტერ იუნაიტედის" აღმასრულებელი დირექტორი ედ ვუდვორდი: "გულშემატივართა უსაფრთხოება ჩვენი უმთავრესი პრიორიტეტია.

მინდა, მადლობა გადავუხადო პოლიციას უმაღლესი დონის მხარდაჭერისთვის და ორივე გუნდის გულშემატკივრებსაც.

კლუბი უსაფრთხოებას სერიოზულად უდგება და პერსონალს რეგულარულად ავარჯიშებს პოლიციასა და უსაფრთხოების სამსახურთნ ერთად, რათა ასეთი ინციდენტები აღმოჩენილი და აღკვეთილი იქნას.

ინციდენტს გამოვიძიებთ და სამომავლო გეგმებსა და გადაწყვეტილებებს გაცნობებთ".

წყარო: manutd.com