ხუან მატას მიაჩნია, რომ "ნორვიჩ სიტისთან" "ქეროუ როუდზე" მოპოვებული გამარჯვება არის მხოლოდ მნიშვნელოვანი და არა ის, თუ რა გზით იქნა მოპოვებული ეს სამი ქულა.

ესპანელმა ნახევარმცველმა "იადონებს" კარიერაში მეხუთე გოლი გაუტანა - მეტი, ვიდრე ნებისმიერ სხვა გუნდს - რითაც "წითლებს" სამი ქულა მოუტანა და გუნდი კვლავ აგრძელებს ოთხეულისთვის ბრძოლას.

"გამარჯვება გვჭირდებოდა, მაგრამ ბოლო სამი მატჩის მოგებაა საჭირო და ამასთან ერთად "მანჩესტერ სიტისა" და "არსენალის" მატჩს უნდა დაველოდოთ. ცუდად დავიწყეთ, ისინი პრესინგს მიმართავდნენ და შანსები ჰქონდათ, მაგრამ თამაშს ვაკონტროლებდით და ბევრი შანსი გვქონდა უფრო მეტი გოლის გასატანად, ასე რომ, დღეს ბედნიერები ვართ.

მე ერთადერთი ვარ, ვინც დღეს გოლი გაიტანა, ამიტომაც ბედნიერი ვარ, რომ მე მხვდა წილად გამარჯვების გოლის გატანა. საქმე გაკეთებულია. დღეს მხოლოდ გამარჯვებას ჰქონდა მნიშვნელობა. ყოველთვის ჩვენი ფეხბურთის თამაში, მომენტების შემქნა გვსურს და ეს შევძელით. დასასრულს გავიმარჯვეთ და სეზონის ბოლოს ეს ძალიან მნიშვნელოვანია.

ჩვენ ყოველთვის ჩვენი დონის შესაფერისი გამარჯვების მოპოვებას ვცდილობთ. დღეს გაგვიჭირდა, რადგან არ ველოდით, რომ ასეთი სიცხე იქნებოდა და თანაც მოედანი ოდნავ სველი იყო", - განაცხადა ესპანელმა.

მატამ გამარჯვება მატჩის შემდეგ სტუმარ გულშემატკივრებთან ერთად აღნიშნა და იმედოვნებს, რომ "წითლები" "უემბლიზე" მოპოვებულ წარმატებას ოთხეულში მოხვედრასაც დაურთავენ.

"ძალიან კარგია, როცა სტუმარ გულშემატკივართა წინ მდგომ კარში იტან გოლს. ყველაფერს გულშემატკივრებისთვის ვაკეთებთ. რთული სეზონი ჰქონდათ და ბედნიერებას იმსახურებენ, იმედი მაქვს, ჩემპიონთა ლიგაზე მოვხვდებით და მათთვის ინგლისის თასს მოვიგებთ".

"იუნაიტედს" ძალიან რთული დასაწყისი ჰქონდა მზიან აღმოსავლეთ ანგლიაში, სადაც ენტონი მარსიალმა გახურებისას მიიღო ტრავმა, ხოლო მატეო დარმიანმა მატჩის მე-18 წუთზე.

"მატჩის დაწყების საუკეთესო საშუალება ნამდვილად არ ყოფილა. ენტონი ჩვენთვის მნიშვნელოვანი ფეხბურთელია, ისევე როგორც დარმიანი და იმედი მაქვს, "ვესტ ჰემისთვის" ფორმაში იქნებიან".

სამშაბათს საღამოს მატა "ჩაქუჩების" სტადიონზე ზღაპრულ ატმოსფეროს ელის და იმედი აქვს, რომ "იუნაიტედი" "აპტონ პარკზე" გასამართ უკანასკნელ შეხვედრას მოიგებს.

"განსაკუთრებული საღამო იქნება. "ვესტ ჰემი" დიდებული ისტორიის მქონე დიდი კლუბია, ძალიან კარგი სტადიონი აქვთ, სადაც დიდებულ ატმოსფეროს ქმნიან. ვიცით, რომ რთული იქნება სტუმარი გუნდისათვის და იმედი გვაქვს, შევძლებთ ვთქვათ, რომ იმ სტადიონზე გამართულ უკანასკნელ შეხვედრაში ჩვენ გავიმარჯვეთ".

წყარო: manutd.com