"მანჩესტერ იუნაიტედის" მთავარმა მწვრთნელმა "კრისტალ პალასთან" გასამართი მატჩის წინ განაცხადა, რომ ინგლისის თასის ნახევარფინალურ შეხვედრაში უეინ რუნის მონაწილეობა "არწივებთან" შეხვედრაში მის მიერ ნაჩვენებ თამაშზე იქნება დამოკიდებული.

"წითელი ეშმაკები" დღეს "ოლდ ტრაფორდზე" ალან პარდიუს გუნდს უმასპინძლებენ და ოთხეულისთვის ბრძოლაში სხვაობის შემცირებას ეცდებიან. სამ დღეში კი ვან გაალის გუნდი "უემბლიზე" "ევერტონს" შეხვდება და ინგლისის თასის ფინალისტის ვინაობას გაარკვევს.

"წითლების" კაპიტანმა თებერვალში მიღებული ტრავმის მოშუშება და მოედანზე დაბრუნება უკვე მოახერხა "ასტონ ვილასთან" მატჩში, დღეს კი მეორე შეხვედრას ჩაატარებს სასტარტო შემადგენლობაში დიდი ხნის უქმობის შემდეგ.

ვან გაალი აცხადებს, რომ უეინ რუნის თამაში "ევერტონთან" მატჩში მის ფორმაზე იქნება დამოკიდებული.

"ეს დამოკიდებულია იმაზე, თუ როგორ თამაშობს, როგორც ყველა ფეხბურთელის შემთხვევაში. დანამდვილებით ვერ იტყვი, რომ შაბათს ითამაშებს. "ვილასთან" მატჩში ძალიან კარგი პირველი ტაიმი ჩაატარა. მეორეში კი იღლებოდა და 60 წუთი მის ფეხებს დაეტყო.

სამშაბათს ივარჯიშა, ასე რომ, ფორმა აღიდგინა, ამიტომაც უნდა ვნახოთ, როგორ იგრძნობს თავს "კრისტალ პალასთან" მატჩში და თანაც კარგად უნდა ითამაშოს", - განაცხადა ჰოლანდიელმა.

წყარო: The telegraph