"მანჩესტერ იუნაიტედის" მთავარი მწვრთნელი თვლის, რომ მის გუნდსა და "ტოტენჰემს" შორის დიდი სხვაობა არ არის.

გასულ ორშაბათს "დეზებმა" "სტოკ სიტი" გასვლაზე დამაჯერებლად 4:0 დაამარცხეს, ერთი კვირით ადრე კი მაურისიო პოჩეტინოს გუნდმა "წითელ ეშმაკებს" 3:0 სძლია.

ლონდონური კლუბი მეორე ადგილზე იმყოფება და ჩემპიონობისთვის იბრძვის, "იუნაიტედი" კი მეხუთეზე და ჩემპიონთა ლიგის საგზურის მოპოვებას ცდილობს.

თუმცა ვან გაალს მიაჩნია, რომ კრეატიული სტილის ფეხბურთელის ყოლის შემთხვევაში მის გუნდს 12-ქულიანი ჩამორჩენა არ ექნებოდა "ტოტენჰემთან".

"მიმდინარე სეზონში "ტოტენჰემი" 1:0 დავამარცხეთ და ახლახან ჩატარებულ მატჩში 70-ე წუთამდე, ჩემი აზრით, ჩვენ უკეთესად ვთამაშობდით, მაგრამ მერე გაუგებრობას წავაწყდით.

ამიტომაც არ ვფიქრობ, რომ "ტოტენჰემსა" და "მანჩესტერ იუნაიტედს" შორის დიდი განსხვავებაა. სხვაობა მხოლოდ ქულებშია. მათ უფრო მეტი გამარჯვება მოიპოვეს, უფრო მეტი გოლი გააქვთ, რადგანაც უფრო მეტი კრეატიული ფეხბურთელი ჰყავთ.

ადრე ვთქვი, რა გვჭირდებოდა და ეს, ჩემი აზრით- გამოცდილი კრეატიული ფეხბურთელია. არ შეიძლება მივიღოთ ნებისმიერი, ვისაც მოვინდომებთ, რადგან ეს ფეხბურთელზე, კლუბზე და იმაზეა დამოკიდებული, რამდენს გადაიხდის "იუნაიტედი", - განაცხადა ვან გაალმა.

წყარო: mirror