ანდერ ერერა "მანჩესტერ იუნაიტედს" "კრისტალ პალასთან" მატჩში დაუბრუნდება, ლუი ვან გაალს კი "ასტონ ვილასთან" მატჩის შემდეგ ახალი ტრავმირებული ფეხბურთელი არ ჰყავს.

"ვესტ ჰემთან" ინგლისის თასზე მიღებული ტრავმის გამო ერერამ ბირმინგემელებთან მატჩი გამოტოვა, მაგრამ პრემიერ ლიგას "ოლდ ტრაფორდზე" უახლოს მატჩში დაუბრუნდება.

ბასტიან შვაინშტაიგერი, ადნან იანუზაი და ლუკ შოუ კვლავ რჩებიან ლაზარეთში.

ვან გაალმა "იუნაიტედის" ტელევიზიას განუცხადა: "ტრავმების პრობლემა არ გვაქვს, მხოლოდ ის ფეხბურთელები, ვინც დიდი ხანია უქმობენ- შვაინშტაიგერი, შოუ და იანუზაი. ვფიქრობ, ერერა დაბრუნდება".

როცა ჰკითხეს, შაბათს ინგლისის თასის ეგიდით "ევერტონთან" გასამართი მატჩი თუ მოახდენდა "არწივებთან" მატჩში გუნდის ძირითად შემადგენლობაზე გავლენას, ვან გაალმა უპასუხა: "რა თქმა უნდა, მაგრამ ეს ყოველ მატჩში ხდებოდა.

იცი, რომ მატჩი გაქვს სათამაშო და იცი ასევე, რომ ზოგიერთ ფეხბურთელს უჭირს მატჩების სიჭარბესთან გამკლავება. ამის გამო როტაციის გამოყენება გიხდება.

პრემიერ ლიგაში უფრო ხშირად მიხდება როტირება, ვიდრე სხვა ჩემპიონატში და ეს განპირობებულია პრემიერ ლიგის რიტმით".

მარკუს რეშფორდმა "ვილასთან" მატჩში გამარჯვების გოლი გაიტანა - თავისი მეშვიდე ბურთი 12 მატჩში - სანამ ენტონი მარსიალი შეცვლიდა და ვან გაალის მოლოდინით, 18 წლის ფეხბურთელი ოთხშაბათსაც ითამაშებს.

"70-ე წუთის შემდეგ შევცვალე, როგორც მახსოვს და ესეც იმიტომ, რომ დასვენების საშუალება მიმეცა. მატჩამდე ერთი დღით ადრე და მანამდე ერთი დღით ადრეც არ უვარჯიშია.

მისი სიჯანსაღის შენარჩუნება მინდა, რადგან ახლა გოლების გატანის მუხტზეა და ეს მასთან ერთად გუნდისთვისაცაა მნიშვნელოვანი. ამიტომაც არ ვცვლი მას".

რაც შეეხება ლუკ შოუს, ვან გაალმა მის შესახებ განაცხადა: "ძალიან პოზიტიურად, დიდებულად შრომობს. ფიზიოთერაპევტთან ერთად ვარჯიშობს, მაგრამ საფეხბურთო მწვრთნელთან ერთად უნდა ივარჯიშოს, რაც ჯერ არ მომხდარა".

წყარო: manutd.com