ხუან მატა აღიარებს, რომ "მანჩესტერ იუნაიტედს" "ასტონ ვილასთან" რთული შეხვედრა გამოუვიდა, მაგრამ აღნიშნავს, რომ მხოლოდ გამარჯვებაა მნიშვნელოვანი და ჩემპიონთა ლიგის საგზურისთვის ბრძოლა.

ესპანეთის ნაკრების ფეხბურთელი სასტარტო შემადგენლობას დაუბრუნდა და ლუი ვან გაალის შეგირდებს სამი ქულის მოპოვებაში დაეხმარა.

მატჩის შემდეგ მატამ კლუბის ოფიციალურ ტელევიზიას ინტერვიუ მისცა: "მოგება მოგებაა და ჩემპიონთა ლიგაზე მოსახვედრად მნიშვნელოვანი იყო. "მანჩესტერ სიტი" "ჩელსის" უნდა შეხვდეს (მატჩი "სიტის" გამარჯვებით 0-3 დასრულდა) და ადვილი მატჩი არ ექნებათ, ასე რომ, მნიშვნელოვანი ქულები მოვიპოვეთ. დიახ, მეტი გოლის გატანა შეგვეძლო, მაგრამ მოგება მოგებაა.

შეიძლება, გულშემატკივარსა და მედიას გამარჯვება გარანტირებული ეგონა, მაგრამ ჩვენ ასე არასდროს ვთვლით. პრემიერ ლიგაში არ აქვს მნიშვნელობა, გუნდი სატურნირო ცხრილის მწვერვალზეა თუ ფსკერზე, აქ ყოველთვის რთულია. "ასტონ ვილამ" სიამაყით ითამაშა და ეს ადვილი როდია, სრულიად კონცენტრირებული უნდა იყო, ჩვენ კი ბოლო ხუთ წუთში არ ვყოფილვართ და მათ შანსები შექმნეს. მნიშვნელოვანი დღეა, რადგან გავიმარჯვეთ.

ახლა "კრისტალ პალასს" ვხვდებით და იმედი მაქვს, ამასაც მოვიგებთ, შემდეგ კი ინგლისის თასის ნახევარფინალია, რაც ორ ძალიან ნათელ მიზანს გვისახავს: მოგებას - თუ შევძლებთ - პრემიერ ლიგაში დარჩენილი თითოეული შეხვედრისა ჩემპიონთა ლიგაზე მოსახვედრად და ინგლისის თასის მოგებას, რომელიც კლუბს ბოლო წლებია არ მოუგია. ორივე მათგანზე სრულად კონცენტრირებულნი ვართ".

მატამ მატჩის ერთადერთი გოლის ავტორი მარკუს რეშფორდი შეაქო. ახალგაზრდა ინგლისელმა მე-12 შეხვედრაში მე-7 გოლი გაიტანა.

"საჯარიმოში უნდა იყოს, რადგან ყოველთვის, როცა საჯარიმოშია, გოლს იტანს. თავისი გოლებითა და მოძრაობებით გვეხმარება და ყველანი ბედნიერები ვართ მისი და აკადემიიდან მოსული სხვა ფეხბურთელების გამო. განსაკუთრებით კი მის გამო, რადგან ახლა კარგი პერიოდი აქვს ვიმედოვნებ, სეზონის ბოლომდე გააგრძელებს გოლების გატანას.

ის ბედნიერია გამარჯვებით, მაგრამ არა მატჩით, რადგან სეზონის საუკეთესო შეხვედრა ნამდვილად არ იყო. დღეს ჩვენი საქმე გავაკეთეთ, რის გამოც ყველა ბედნიერი უნდა იყოს, რადგანაც ძალიან კარგი უიქენდი გვაქვს. სეზონის განმავლობაში დღევანდელის მსგავსი მატჩები არაერთხელ წაგვიგია, ასე რომ, ეს პოზიტიური დღეა", - დაასრულა ესპანელმა.

წყარო: manutd.com